Ich Chvnrat von volkenstorf vergihe an disem brief vnd tvn chvnt allen den, di in sehent vnd horent lesen, daz ich mein gv^et ze waldmanstorf, daz mein lehen ist gewesen von dem Goteshovs ze freisingen, gesv^ehtes vnd vngesv°htes verchovffet han minem herren Bischof Emichen ze ffreisingen, der sein mein rehter lehen herre gewesen ist, vmb fvmfczehen pfvnt phenning vnd lob ovch an disem brief, ob miner erben chainer oder ieman meiner vrevnde dem vorgenantem minem herren bischof Emichen oder sinem goteshovs an dem selben gv°t chainen chriech wolt machen oder tvn, des sol ich sein gewere vnd ovzrihter sein an allen sinem schaden vnd gib im vnd sinem goteshovs ze v°rchvnde vnd ze gezevge disen brief mit minem hangentem jnsigel. Ditz ist geschehen, da von Christes gebvrt waren Tovsent zwai hvndert, in dem aht vnd nevnczigistem iare des svnnetages nach sand philippes vnd sand Jacobs tage.

Source Fulltext: OÖUB 4 (Wien 1867), S. 282-283, Nr. 304