Ich philipp von polnhaim vnd min bruder her Hainrich von polnhaim tun chunt allen den, di disen brief lesent oder horent, si sin lemtich oder tode, daz wir Hern vlrich von Truchsen vnd sin chinden haben gegeben vnsern aigen man ludwiden vlgeres sun mit vnserm gu^etlichen willen zergetzung w^er Rudolfen den dorn, den hertel von petenpach ze tode sluch. daz im daz stet vnd vnverchert belibe, dar vber gebe wir im disen brief mit vnsern insigelen vnd di zivge, die hie gescriben stent: Her wichart von polnhaim, her alber sin bruder, her Reinprecht ir bruder, her chunrat von polnhaim, her wernher von slierbach, her wernhart von harthaim, her Gotfrid von Pernawe, her Christan der vogt von wels, her ortolf von hungerperg, Chunrat sin bruder, Friderich ir bruder, Wolfhart der moser vnd ist daz geschechen, do von Christes burt waren tausent iar, zwai hundert iar vnd nevnzich iar, darnach in dem neuntem iar des mantages nach invocauit.

Source Fulltext: OÖUB 4 (Wien 1867), S. 307-308, Nr. 330