Ich Ditmar hern Sigharts sun von Lobenstain tvn chvnt allen den, di disen brief an sehent vnd in lesen horent, di nu sint vnd noh chvmftich werdent, daz ich daz havs ze Herttenstain halbes vnd Levt vnd gu^et, daz dazu gehoret, is si u^erbar oder swi is genant ist, ze holze vnd ze velde vnd ze wisen, verlehent vnd vnverlehent, versvchet vnd vnversu^echet dem erbern manne hern Hainrich von walsse vnd sinen erben verchauffet vnd gegeben han vmb vier hvndert phvnt an dreizich phvnt phenninge mit mines vetern albers von Lobenstain gu^etem willen, wand er im ouch mit minem guten willen sinen tail an dem vorgenanten havse vnd gu^ete gegeben hat. wand aber ich der vorgenanten phenninge reht vnd redelich geweret bin, da von lob ich Ditmar vnd lob ouch ich Hainrich von volchenstorf zu minem aidem Ditmarn von Lobenstain, der vorgenant ist, daz wir des vorgenantten halbes havses ze herttenstain vnd alles dez gu^etes, daz da zu^e gehoret, als vor bescheiden ist, scherme vnd geweren schvllen sin hern Hainrichs von walsse des vorgenanten vnd siner Erben nah des Landes reht vnd gewonheit. were aber daz, daz wir im, des got nicht engeb, des vorgenanten gelvbes nicht laisten, swelichen schaden er da von nimet, den sol er haben ouf dev, daz wir haben in dem Lande. Daz disev rede stete vnd vnvercheret belibe, darvmb so gebe wir beide dem vorgenanten hern Hainrich von walsse vnd sinen Erben ze einem vrchvnde disen brief mit vnserr beider jnsigeln vnd di gezevge, der namen hie geschriben sint, Daz ist der vlrich von chappelle, der Chvnrat von chappell, der Levtold von Chvnringe, alber von Chvnring, Der ortlieb vnd der hadmar von winchel, der vlrich, der Otte. Ditrich vnd alber von Pilhtorf, der hadmar von Svnneberch, der Eberhart, der vlrich, der friderich von walsse, Hadmar vnd alber von Schonenberch. Der brief ist gegeben nah vnsers herren Christes gebvrt vber tavsent jare, in dem drev hvndertistem jare an sant Georgen Tage.

Source Fulltext: OÖUB 4 (Wien 1867), S. 338-339, Nr. 364