Wir hadmar vnd erchenger von wesn tyn chvnt allen den, die disen prief an sehent oder horent lesen, daz wir vns lieplich vnd minchlich verricht haben mit vnsem Oechaimen den waldecha^ern Ortolf, Hadmarn vnd ma^engoz vnd allen ir geerben vmbe alz daz, daz si ze recht anerbet von ir Muter vrown Agnesen, dev vnser swester was, also bescheidenlich, als hie her nach geschriben stat, vnd haben wir den vorgenanten waldeka^ern vnsern oecheimen vnd allen irn geerben gegeben vurbaz vur alle ansprach a^ein dritteil an dem hous ze wesen vnd ain dritteil an dem tvrn, der vor dem hous leit, vnd ain drittail alles des eigens, daz zv dem hous geho^eret, vnd als vil daz a^eschenperg dev gvt vnd Nevnchirchen der marcht sol vnser wesna^er sein vnd vnser geerben vurbaz an alle ansprach von in vnd ir geerben. vnde dar wider haben wir in waldeka^ern gegeben den marchte ze Rowrippe vnd swaz dar zv gehoret, der sol ir vnd ir geerben sein vurbaz von vns vnd vnser geerben an alle ansprach, vnd suln ouch wir in daz sta^etigen mit aller der sta^etigunge vnd si darzv bedvrffen, vnd haben ouch vns des beidenthalben mit verdachtem mvt gen an ander vertrewet vnd verlubt, daz vnser cheiner sinen teil an dem vorgenanten hous oder an dem tvrn oder sinen teil an dem eigen, daz dar zu geho^eret, nicht verchoufen noch an werden sol, er sul in e die andern an pieten vnd sol si mit im lazen werben freuntlich vnd zeitlich nach ir frevnd vnd ir lute rat, vnd swa vns die nicht mochten mit anander verrichten, so sol er sinen teil denne erst an werden swo er mach. Vnd suln ouch wir lieplich vnd freuntlich mit anander leben vnd sol ouch vnser cheiner nicht an grifen noch werben, daz den andern ze schaden chomen mvge, er entv ez danne mit der andern gunst vnd mit ir rat. vnd sol ouch vnser cheiner cheines vnsers diena^ers wider des andern willen nicht enheimen, neur er enwelle im in denne gehuldigen, vnd sol auch vnser cheiner sich keines diena^ers nicht vnderwinden noch behalten, der dem andern nicht enfuge. pei dem frevntlichen teidingen vnd der lieplichen verrichtvng sint alle die gewesen, die hie hernachgeschriben stant, vnd sint sin ouch gezevgen. Der abt von engelzelle, der eltor her Ma^engoz von waldecke der chorherre, her Alber von morspach der chorherre, her Choloch der valchenstena^er, Dietmar der lerbuchla^er, Fridrich von pa^esching, Ott der Drechselheima^er, heinrich der louterbrvnna^er vnd siner svn zwen hainrich vnd ortel, vlrich der peterscheima^er, Fridrich der swa^enwarta^er pertholt der teufenpech, Ott vnd irmfrit die zwen chlafpechen. Chunrat von Oed, hainrich von Oed, vlrich von Oed, albert der steina^er, Chvnrat der steina^er, Eberhart von wa^eidach, wernhart von a^ezelsperg vnd sin bruder chvnrat, vlrich von Ort, Arnold von Ort, Ulrich von aichperg, vlrich der ivng aichperga^er, Chvnrat von aichperg, wernhart der uogel vnd ander piderbe lout, die da bei worn vnd die doch hie nicht geschriben sint. Daz daz also sei vnd sta^et belibe, des geben wir wesna^er waldecha^ern disen gagenwurtigen prief mit vnsern insigelen. Der prief ist geschriben vnd gegeben nach christes geburte tousent iar, drev hundert vnd in dem letzten iar an Sant philippes vnd sant Jacobs tag.

Source Fulltext: OÖUB 4 (Wien 1867), S. 342-343, Nr. 368