Wier Dietreich vnd ott bruder genant di weizzenwerger tuen zewizzen allen den, di disen brif lesent, sechent oder horent lesen, Daz wier mit vnserr mv^eter willen vern ... vnd mit vnserr vetern hern Chvnrates vnd hern Georgens seines bruder vnd anderr vnser vrevnt willen haben dem erweren herren hern Hainreichen dem phfarrer dotz Traisem verchavft vnseres rethten aigens ain haus, daz leit pei der chirchen dotz traisem, mit ainem Pavngarten vnd mit ainem holtz vud mit alle dem, daz zv dem haus gehort, durch got vnd auch dvrch sein phfenning, wond er vns sechzig vnd sechsthalb phfvnt phfenning dor vmb gegeben hat. Daz selb vor gesprochen havs mit alle dev vnd do zve gehort, Daz vnser vodern vnd vnser vater her Dietreich, des sel got hab, vnd auch wier Dietreich vnd Ott in aigens gewer an all ansproch manch iar inn haben gehabt, Mit dem selben retht geb wier iz dem vorgenanten herren hern Hainreichen dem phfarrer von Traisem also, daz er vnd all di phfarrer, di noch im choment, sehvllen vnser lemtig vnd tod vnd vnseres vater sel hern Dietrechs des weizzenwerger vnd aller vnserr vodern gedenchen fleizzichleichen vnd daz der oft gesprochen phfarrer von Traisem her Hainreich vnd di phfarrer, di noch im choment, vnser des dergerner gedenchen, so nem wier vns an fuer all vnser vrevnt vnd gehaizzen im vnd den phfarrern, di noch im choment, daz oft genant haus mit alle dev vnd do zve gehort, ze schermen noch landes recht in vnserr chost, swo sein not geschiecht. vnd daz ditz gelu^eb stet vnd vnzebrochen beleib, so geb wier Diettreich vnd Ott di weizzenwerger disen brif verinsigelten mit vnserr baider insigel, Do auch zv ainer ewigen bestetigvng di erweren herren her pavl der apt von lylienveld vnd her Stephfan der Hohenwerger habent ier paider insigel an geleit. Des sint gezevch her Chvnrat der phfarrer von sand veit, her Nyclas der phfarrer von sand Gylgen, her Ortolf der phfarrer von wilhalmspuerch, her Seibot von Chrevpach vnd di erweren levt her Andre, her levpolt auf dem hof, her Chvnrat der drochsel vnd anderr piderlevt genvech. Daz ist geschehen, do von Christs gepverd woren tausent Jar, Drevhvndert Jar, in dem Nevten Jar an sand Georgen tach.

Source Fulltext: OÖUB 5 (Wien 1868), S. 19-20, Nr. 16