Ich Ortneid von Tannberch vergih vnd tvn chvnt allen den, die disen brif sehent vnd horent lesen, daz die zehent avf dem purchreht ze aldenvelden, div zwain gesetz sint mit miner hant von hainrich von winsperch vmb zehent phvnt phenning dem gotzhavs datz aldenvelden mit der bescheidenheit, daz niement loesen sol, nv^er ich vnd miniv chint vnd der selbe geschol Hainrich von winsperch, vber die rede gib ich ortneit von Tannberch minem (sic) brif mit minem insygelt, daz div rede stêt vnd gantz vnd vnzebrochen beleibe, der rede ist zevch her vlrich der pharrer vnd Seibot der Poxrucker vnd wilhalm der winsperger vnd Seibot von Stainaperge vnd ander piderber levt genvch. der brif ist gegeben, do von christes gebu°rt waren zergangen tavsent iar vnd dew (sic) hvndert iar, darnach in dem nevnten iar an sand Petronelle tach.

Source Fulltext: OÖUB 5 (Wien 1868), S. 21, Nr. 17