Ich wernhart von Schoumberch vergich vnd tu^en chunt an disem prief allen den, die in an sehent oder horent lesen, di nu sint vnd her nach chunftich werdent, daz ich daz gu°t datz Dietrichstorf, daz friedreich vnd sein Bru°der Chunrat vnd ir Erben uon meim Vater gehabt habent, daz selbe Gu°t hat der egenant fridreich vnd Chunrat sein pruder uon Dietreiehstorf vor mier aufgeben mit gu°tem willen vnd auch ze der zeit, do si iz wol getu^en mochten, vnd han ich daz vorgenant Gu°t gelihen dem Erbern mann Hern Berchtolden uon Staina, vrouen Gedrauten seiner Hausurowen vnd allen iˆren Chinden paidev Sunen vnd tochtern, die si mit einander habent vnd auch noch gewinnent, ze rehtem lehen allen iˆren vrumen da mit ze schaffen, als si ze reht schullen vnd schol ich dez vorgenaten (sic) Gu°tes datz Ditreichstorf mit alle dev vnd dar zu^e gehort versucht vnd vnuersucht herr vnd Gewer sein hern Berchtolz uon Staina, vrouen Gedrauten seiner hausurowen vnd ier paider Chind fu^er allen Chrieg vnd fu^er alle ansprach, als Landesreht vnd gewonhait ist in Osterreich. Daz dev red Gantz stete vnd vnuerchert beleib, So gib ich dem oftgenanten Hern Berehtolden uon Staina, vrouen Gedraufen seiner Hausurowen vnd ier paider Chinden disen Brief zeim sichtigen v^erchund vnd zeim ebigen zeug diser sache uersigelt mit meim Anhangunden insigel vnd sind dez Gezeuch her Chunrat uon potendorf, her Stephan uon Meissauw vnd her albrecht uon Chuenring, her Eberhart, her hainrich, her vlreich vnd her friedreich Gepru^eder uon walsse, her wernhart uon Ro^etenuel, her Leutold der haimpech, Chunrat uon Mitterberch vnd Ru°dolf der Schiuer, Helmweich der Chuliber vnd andrer piderber leute genu^eg. Diser prief ist geben, do man zalt uon vnsers Hern Christes gepu^erd dreuzehen hundert jar, dar nach in dem zwelften jar des pfinztags an sand vrbans tag.

Source Fulltext: OÖUB 5 (Wien 1868), S. 80-81, Nr. 77