Ich vlreich von Chrotendorf vergich vnd tv^en chunt allen den, di nu lebent oder her nach chu^emftig sint, di disen prief sehent oder ho^erent lesen, daz ich willichleichen vnd mit verdachtem mv^et vnser vrawen ze lob vnd ze eren vnd irm gotzuavs dacz dem Slag ze fv^edrung vnd den prv^edern da selbst durch meiner sel hail vnd saelichait gegeben vnd geschaft han dreizzig phunt passawer phening avf meinem weingarten pei Zebing am haelenstain, den ich gechauft han vmb mein phening also beschaidenlich, ob ich in di selben phening pei mir lebentigen nicht engaeb, swie ich denn veruar mit gescheft oder an geschaeft, so sol daz vorgenant gotzhavs vnd die pruder dez selben weingarten sich v^enderwinden vnd inne haben mit allem nvtz ze einen rechten satz, di weil di vorgenant dreizzig phunt pfening in nicht gaenzleichn gegeben werden von dem, swem ich in schaff oder swem er gevall. vnd daz daz dem Goczhaus stat vnd vnzebrochen beleib, Dez sint gezevg mein lieber vater Ott von Chrotendorf vnd mein prvder Stephan, Dietel avz der aw, Her vlrich der probst, Niclos der preiol, Ditreich, Chunrat der subprior vom Slag vnd ander piderb levt. Dar v^eber gib ich in auch den verinsigelten prief mit meinen jnsigel. Der ist gegeben, do von Christes geburd waren Tavsent jar, drevhundert jar, in dem viertzehenten jar dez Eritags nach Phingsten.

Source Fulltext: OÖUB 5 (Wien 1868), S. 130, Nr. 130