Ich Chalhoch vnde Fridreich vnd Cvnrat di valhenstainer wir vergehen und tw^en chwnt allen den, di disen prief zehent oder horent lesen, daz wier mit verdotem mw^et das gw^et all da ze Chazlein mit dem purcstal vnd dem ganzen zehent dravf vnd mit allem dem, daz darzv geho^ert versuchtz vnd vnversuchtes haben geben dem Gotshavs vnd den prudern da ze dem Slag uns vnd allen vnsern vodern zem zelgret ewicleichen vnd ledicleichen zv haben an vnser vnd aller vnser afterchwnft ansprach. Vnd daz daz dem vorgenanten gotshaus vnd den prudern steet vnd vnuerchert beleib, dar vber geb wir in disen prief veringsigelten mit vnsern ingsigeln, Dez zeint gezevg Her vlreich der pfarrer von velden, Her Purchart der pfarrer von Rorbach, Hainreich der zenc vnd zein zwen (sic) der philip, Irmfrid der Clafpec, Dietreich der Sreiber, Jordan der smid, Seybot der amman ab dem aigen, Vlreich vnd Menhart di Clenawer, Der prief ist geben, do von Christus pwrt waren dreizehen hundert, in dem vierzehentem iar an zant philipstag.

Source Fulltext: OÖUB 5 (Wien 1868), S. 128, Nr. 128