Fridericus dei grada Romanorum Rex semper augustus Vniuersis Comitibus, Nobilibus, Ministerialibus, Militibus, Militaris condicionis Hominibus, Ciuitatibus sev earum Rectoribus, Judicibus, Officialibus necnon Mutariis vel Theloneariis ac aliis quibuscumque presentes litteras inspecturis Imperpetuum. Non gratis a datore omnis gracie proueniens gracia Regni nos prefecit solio, Sed vt gracie sue memores aliis, specialius tamen suis die noctuque laudibus indesinenter insistentibus graciarum munera parciamur. Eapropter Honorabilibus et Religiosis viris ... Preposito et Fratribus Monasterii in Plaga sancte Marie ordinis Premonstratensium Patauiensis dyocesis deuotis nostris dilectis, quos sincero caritatis ardore conplectimur, ob celebis vite fragranciam, vt diuinum comodius exequantur cultum, nos que (sic) fratres nostros (nos fratresque nostros), nomine quorum et consensu infra scripta facimus, suis oracionibus, quas ex hoc promereri credimus, aptiores diuino reddant munere, Hanc duximus de liberalitate Regia graciam faciendam, quod fratres sev procuratores vel nuncij prenominati Monasterij in Plaga sancte Marie annis singulis Quindecim carratas vini libere sine omni requisicione Thelonei sev Mute in Danubio sursum ducere perpetuo valeant ex nostra fratrumque nostrorum Ducum austrie predictorum indulsione debeant atque possint, Mandantes vobis vniuersis et singulis et specialiter Mutariis sev Theloneariis, qui super Danubio perpetuo fuerint constituti, firmiter et districte, nequis ipsos in vini huiusmodi decuctione per allicuius exactionis, requisicionis sev recepcionis Thelonei sev Mute genus in futurum debeat molestare, sicut nostram et fratrum nostrorum indignacionem grauissimam volueritis euitare. In cuius gracie nostre testimonium presentes literas maiestatis nostre Sigillo iussimus conmuniri. Datum wienne kalendis aprilis anno domini M°.CCC°. Sextodecimo, Regni vero nostri anno Secundo.

Source Fulltext: OÖUB 5 (Wien 1868), S. 160-161, Nr. 162