Wir Fridrich von Gottes gnaden Ro^emischer Künig allczit ain merer dez Riches tvn kunt mit disem brief Allen, die in ansehent oder ho^erent lesen, daz wir vnserm getru°wen lieben Vlrich von Walsse vmb sinen dienst fu^er sin Burghu°t vnd fu^er Burgschaft, da wir in versetzet haben, gelten suln Vierhundert marche gewegens silbers Gretzer gewihtes Vnd loben im mit diesem brief, daz wir noch vnser Bru°der noch vnser erben die Behusunge ze Rv^ekersburch von im noch von sinen erben niht lo^esen su°ln, wir haben siv denne dez vorgenanten silbers verihtet gar vnd gaentzelich vnd darzu° suln wir im gelten Drivhundert phunde phenninge Wiener Mu^entze, dar vmbe er Velnpach vnserne Marcket von ... Dez Truchsessen saeligen wirtenne von Emerberch erlo^eset hat, vnd haben im denselben Marcket Velnpach vmb div vorgenanten Drivhundert phunde versezet ze rehtem phande. Und sol er vnd sin erben Rv^ekersburch die behusnnge vnd daz darzu° ho^eret vnd velnpach den Marcket haben vnd niessen iemer vntz an die stunde, daz siv baide dez vorgenanten silbers vnd der phenninge gewert vnd verriht werdent gar vnd gaentzlich. Vnd were, daz er diz satzunge iemen ander schu^effe oder versatzte, der sol div selben reht darvf han, div er dar vf hat vnd als da vorgeschriben stat. Vnd dez ze. ainem vrku°nde ist vnser ku^eniglich Ingesigel gehencket an disen brief; Der ist geben ze Wienne an dem Mantage vor dem Balmetage, Do man von Gottes geburt zalte Drivzehen hundert iar, darnach jn dem Sehtzenden iare, jn dem Andern iar vnsers Riches.

Source Fulltext: OÖUB 5 (Wien 1868), S. 159-160, Nr. 161