Wu^er Graf Chunrat von Schomberch thuen khundt allen den, die disen Prief lesent oder Ho^erent lesen, die nu lebent vnd hernach khünfftich sind, daz wir mit vnser Erben Guettem willen vnd Gunst, mit Verdachtem muet zu der Zeit, da wir jz wol getuen möchten, Verkhaufft haben ze rechtem lechen nach dess landes recht ze österreich zwelif Pfundt Wienner Pfenning geltes, die da ligendt ze Pfaffendorff auf Vier lechen vnd auf ainer Hofstat vnd ze Pernhartstorff auf ainem halben lechen vnd auf Vberlendt achern in dem Hoeuvelde, vmb Sechzig Pfundt Wienner Pfenning, der wir recht vnd redlichen gewert sein, dem Erbern Manne Hainrichen von Pernhartstorff vnd seiner Haussfrauen Agnesen vnd allen jren Erben Paiden Sönen vnd töchtern, die si mit ainander Habent oder noch mit ainander gewinnent, da mit fürbaz allen jren frumen zeschaffen, Verkhauffen, versetzen vnd geben, swem si wellent, an allen jresal, vnd darüber durch bezzer sicherhait so setzen wür Vnss wür Graf Chunrat von Schomberch vnd alle vnser Erben über die vorgenanten gülte Hainrichen von Pernhartstorff vnd seiner Haussfrauen vron Agnesen vnd allen jrn Erben Paideu sunen vnd töchtern, die sy mit ainander Habent oder noch gewinnendt, ze rechtem scherm für alle ansprach, als Lehens recht ist vnd des landes recht ze österreich, Vnd geben jn darüber disen Brief zu ainem offen Vrkhundte vnd zu ainem wahren gezeug diser Sache Versigilten mit vnserm jnsigil vnd seynt auch des gezeug Herr jrnfridt von Eckhartzaue, herr Chadolt von Woehing, Herr Dietmar von Hatmanstorf, Herr Hartweich von ort, Herr Leutolt von Ort, Herr Otte von Purtorf, Rapot von Patzmanstorf, Nijclas von Plode vnd ander frum leute genuech, den dise Sache wol khunt ist. Diser Brief ist geben ze Wienne, da von Christes gebuert waren ergangen dreytzehen Hundert jahr, jn dem achtzehenten jare darnach an Sand Peters Abendt.

Source Fulltext: OÖUB 5 (Wien 1868), S. 210-211, Nr. 213