ICH CHraft von Svnnberch vnd ich Katrei sein Hausvrawe Wier vurgehen vnd Tuen chunt allen den, div disen brief sehent lesen oder horent lesen, div nv lebent vnd her nach chunftich sint, Daz wier mit guetem willen vnd gunst vnser nachchomen vnd nach vnser vreunt rat vnd auch zv der zeit, do wier iz wol getuen machten, gegeben haben der heiligen iunchvrowen sant katrein ze lob vnd ze eren vnser rehten aigens funf schilling geltes, div do ligent datz Asparn auf echern, der dient Hainreich Heroltstorfer drei vnd dreizzig von vier jeuchen, Seidel pei dem Tar drei vnd viertzig von vier Jeuchen, Wolfker an dem marcht funftzig von vier Jeuchen, Leupolt Mistiechin svn vier vnd tzwaintzig von vier Jeuchen. Div vorgenanten gult alle dient man an sant Georigen tag. Wier geben auch div funf schilling geltes Sant katrein in vnser chappeln datz asparn zv ainem ewigen lieht durich vnser baider sel willen vnd durich aller vnser vadern sel selichait sant katrein ze eren vnd niht dem Parrer noch niemant zv ainem nutze . iz schol auch daz selbe lieht nuer bei der naht .prinnen, iz schol auch des vorgenanten liehtes ain bider man phlegen, der in der pharr gesezzen sel datze asparn. Daz div rede vnd daz selgeret stet vnd vnzebrochen beleib von vns vnd von vnsern nach chomen, do geb wier ich vorgenanter Chraft vnd ich katrei sein Hausvrowe vnsern brief vber vur sigelt mit vnser baider insigel. der brief ist gegeben, do von Christ buerde ergangen waren Drutzehen hundert Jar vnd in dem Achtzehenten Jar, dar nach an sant Pangraecentag datz asparn.

Source Fulltext: OÖUB 5 (Wien 1868), S. 215-216, Nr. 218