Ich Ru^eger der Pyber von Gruenberch vnd ich vro Diemuet sein Housvrowe vnd ich vro Margret sein Tohter vnd ich vlrich sein svn, wir verieheu and tuen chunt allen den, die nu lebent vnd her nach chunftig sind, die disen brief an sehent oder horent lesen, Daz wir mit gu^etem willen vnd mit verdahtem muet vnd mit zeitigem rat aller vuser vrivnde ze der zeit, do wir ez wol getuen mohten, verchouft haben vnser hous ze Gruenberch vnd allez daz, daz dor zve geho^ert, mit allem dem reht vnd nucze, als wir ez haben inne gehabt in aigens gewer vnd ez von vnsern vodern an vns chomen ist, an ein Mu^el vnd ein hofstat vnder dem vor benanten Hous ze Gruenberch, die nem wir ous, mit allem dem reht vnd nucze, als wir sev vor haben inne gehabt, daz ander allez, daz zv dem vor benanten hous geho^ert ze veld vnd ze dorf, gestift vnd vngestift, gepowen vnd vngepowen, swie daz benant ist, daz habe wir ze chouffen gegeben dem Erbern Herren hern vlrich von Myssowe dem Marschalch in Osterrich vnd allen seinen erben vmbe sehs hundert phunt wienner phenning vnd vmbe zwaintzich phunt wienner phenninge, der wir reht vnd redlich sein gewert, ze verchouffen, ze versetzen vnd geben, wem sie wellen, an allen irresal. Dor vber ze einer pessern sicherhait setze wir vns, ich Ru^eger der vor benant pyber vnd ich vlrieh sein svn vnd ich vlrich sein brueder vnd ich vlrich sein aydem der vrey ze rechtem scherm vber daz vor benant hous vnd vber allez daz, daz dor zv geho^ert, fur arnolten dez ebenanten Ru^egers svn, der zu sinen iarn nicht chomen ist, wan der zv sinen iarn cho^em, daz der allez daz laisten schol, daz reht ist, vnd daz wir gelaist haben vnd dor zv fu^er alle ansprach, als aygens reht ist in Osterrich, des wir purgel vnd gezeuge sein mit samt vnsern insigeln, waz si des schaden nemen, mit dem reht, den schullen si haben ouf vns vnd ouf allen dem gu^et, daz wir haben in dem lande ze Osterrich, daz lob wir in mit vnsern triwen. Daz dise red stet vnd vnzebrochen beleib, dor vber geb wir in disen brief zv einem ewigen gezeuge diser sache versigelt mit vnsern insigeln vnd mit den erbern gezeugen, die hie benant stent vnd die bej dem chouffe ouch gewesen sind: Her Houch der Tuers vnd her Rinpreht der Tuers von Lychtenvels, her Heinrich von Chyowe, alber vnd wernhart die Strovnen, Alber von Ottenstayn, Chunrat vnd Otte die brueder von Lichtenek, Reinpreht von Schonneberch vnd ander erber lo^eut genu^ech, den die sache wol chunt vnd gewissen ist. Diser brief ist gegeben ze Chrumbenowe, do von christes gebu^erde warn ergangen Tousend iar, drev hundert iar vnd dar nach in dem ahczehenden iar an sand Giligen tach.

Source Fulltext: OÖUB 5 (Wien 1868), S. 228-229, Nr. 232