Wier bru^eder Otto gehaizzen apt von zwetl vnd di Samnunge gemain Tu^en chunt allen den, di disen prief nu oder hernach sehent oder horent lesen, daz vns der erber herr her Eberhart von waltse mit aller seinnr erben gu^etem willen vnd zu einem ewigen selgerêt gegeben hat sechtzehen pfunt geltel seines freien aygens datz Reintal, daz er vm sein aigens gu^et datz dem Smierlein von velsperch gechaufft hat, vnd einen weingarten datz Stain pei der witstat mit solher beschaidenhait, daz man alle freitag in dem iar, di weil daz chloster stet, ie dem herren vnd dem pru^eder da von geben schol ein gewachssen stuch gu^eter vische oder ein schuzzel chlaeiner vische zu aller der pfruent vnd pitantz, die man in su^est geben schol, nu^er swann di Samnunge pei ainem muez vastet oder swann man des freitags ein dienst geit, so schol man daz selb stuche oder di selb schuzzel vische des nechsten tags vo^er oder hin nach geben, swenn ez den pru^edern aller pesste fu^egt, auf di red, daz di selb Samnu^eng di vorgenanten herschaft immer vnd immer dest paz in ierm gepet hab vnd doch besunderleich schull wier ier gehugnuzz haben mit einein iar tag lebntiger vnd toter alle iar an dem prehen tag, so schol man ouch ie dem bru^eder zwai stuch vissch geben. Vnd swanne daz dienst also nicht gegeben wu^ert, sam vor geschriben stet, so schullen sein nechsten erben den apt zwir oder dreistund daran manen, daz daz vo^er geschriben glub gentzleich gelaistet werd; Geschech des denn nicht, so schullen diselben erben sich der vorgenanten gullt vnderwinden vnd schullen di geben auf ein ander gots ho^eus, swo seu aller pesste verlustet. Wo^elt aber her Eberhart der vorgenant von waltse oder sein Sun di vorgenant gullt wider lo^esen oder aus wechsseln, so schullen si vnserm chloster als vil gu^eter gullt wider geben an allen ouf schub vnd an allen chrieg. Die sache alle als sie vo^er genant sint, die lub wier gentzleich behalten vnd laisten pei vnsern trewen an all arig lisstte. vnd darumb so hab wier zu einem warn vrchund vber alle di sache disen gegenburtigen prief gegeben dem offt e genanten hern Eberharten von waltse vnd seinen erben versiglten mit vnserm insigel. Des sint ouch gezeug pru^eder Herwort der preial, bru^eder Ru^eger der vnder preial, pru^eder Arnolt der Ober Chellner, pruder Dietreich der Spitaler, pru^eder Gregorius der Chamrer vnd ander frumer leut genu^ech. Ditz dinch ist geschehen vnd der prief ist gegeben datz Zwetl in dem Chloster, do man von christes gepurd zalt dreutzehen hundert iar, darnach in dem achtzehentem iar an sant Thomans tag.

Source Fulltext: OÖUB 5 (Wien 1868), S. 234-235, Nr. 239