Ich Otte der pyber von Minnepach vnd mein havsfrowe vro Offmey mit allen vnsem Erwen veriehen vnd tven chvnt an disem prief allen den, di in horent lesen oder sehent lesen, di nv lemdich sint oder her nach chvnftich werdent, Daz wir mit guetleichem willen, mit verdahtem mvt, mit gesamtter hant, mit willen aller vnser erwen, zv der zeit, da wir iz wol getven mohten, Hawen verchavtt vnsers rehten aigens hohchethalw (sic) phfvnt phfenig gelts, der da leit avf lehen vnd avf hofsteten daz obern grvenpach vnd daz nidern grvenpach vnd daz grintdorf vnd daz chrottendorf, vnserm liewen vrevnt hern Otten van lihtenek vnd allen sein erwen vm hvndert phfvnt phfening winner mvnz, der wir reht vnd redleich gewert sein. Ich Otte der pyber vnd mein havsfrov vro Offmey mit allen vnsern erwen geluben vnserm lieben vrevnt. hern Otten van lihtenek vnd allen sein erwen vm daz var genant gvet sein ir rehter scherm vnd ir gwer, als aigens reht ist vnd des landes gewonhait in Osterreich. Dar zve zv einer pezzern sicherhait secz wir in zv ewentevr vnsern hof dacz lengeveld, den wir gechavft hawen wider hern Otten sven van grovenwerd, also weschaidenleichen, ow vnser erwen fuer waz wolten sprechen nach der vargenantten gult oder chain irresal dar an machen, so schvln sev di var genantten hvnder phfvnt vnd svbenthalp phfvnt phfenig hawen avf dem vargenantten hof vnd schvln der phfenig da van wechemen, so se nest mvgen, mit vnserm guetleichem willen an allen chrieg vnd an allen irresal. mohten sev aver des Schadens vnd der vargenantten phfenig dacz dem hof niht zv ehernen, so schvln se sein zv^e chomen dacz alle de, vnd wir hawen in dem land zv Oesterreich. Daz dise red vnd di sache stet weleib vnd vnzebrochen, giw ich Otte der pyber disen prief meim liewen vrevnt hern Otten van lihtenek vnd allen sein erwen zv einem ewigen vrchvnd vnd zv einer vestichait vnd zv einem gezevg diser sache versigelt mit meim insigel vnd mit hern Olbers insigel van ottenstain, der mit seim insigel diser sache gezevg ist, vnd mit den gezevgen, di her nach stent geschriwen: vlreich van Merchenstain, Otte der walder, Jans van starhemwerch, her wilhalm van hohenstain, Olber sein pruder, her havch der tvers, Chvenrat der iung van lihtenek vnd ander vrvm lewt genvech, den di red vnd di sache vnd der gewerft wol chunt ist. Diser prief ist gewen, da van Christ puert ist gewesen Tavsent iar, drev hvndert iar, dar nach in dem nevnczehentten iar an sand Oswalts tag daz Razpach in dem havs.

Source Fulltext: OÖUB 5 (Wien 1868), S. 246-247, Nr. 253