Ich Ortneit von Tannberch vergieh an diesem brief vnd tvn chvnt allen den, die in sehent oder horent lesen, die nv lebent vnd herhach (sic) chvmftich werden, daz ich Ortncit von Tannberch vnd mein havsvrowe Margaret mit guetlichem willen meiner dreier sv^ene vlrich, wernhart, pilgreimz vns vnd vnser naht chvmft haben erwelt begrebnv^ess ebichliche in dem mv^enster vnser vrowen stiffte datz dem Slach in passawer pistvm vnd dez ordenz von premonstrai mit der bescheidenhait, die her nach geschriben stat, wir sterben inder lantz oder avzer lantz, da man vns mv^ege erlangen, sol vns der Probst vnd die samnvnge des vor genanten closters raichen mit ir wagen mit drin oder mit vier pristern nach meinen eren, alz ich in dez getrawe, vnd bestaten zv der erde neben vnsern o^eheim den valchenstainoer vnd daz si des dester williger vnd dez vleizzichger sin, dar zv han ich Ortneit von Tannberch bei lebentigen minen leibe mit gu^etlichem willen vnd mit rat meiner vor genanten havsvrowen vnd avch meiner sv^ene, ich sterbe oder genese, in die brvderschaft vnd in daz gebet der vorgenanten Sampnvnge mich ein pholhen (sic) mit zwain gestifften lehen daz stirberch vnd mit fu^enfthalben vngestifften guten im chirslach vnd im Marchslach, div ich in versvchtiv vnd vnversvchtev mit weide vnd mit walde vnd mit wazzer flvzz, die dar zv gehoren, ledichlichen han auf geselt mit disen brief avf vnser vrowe alter vnd in vnd dem chloster zebehalten ebichlich an trv^ebsal vnd an ansprach aller miner nachvmft oder erben, ich han willichlichen vnd an daetichlichen gegeben dar zv zwai volgu^eltigiv (?) lehen datz dem nivndorff, der eins o^ettel der nimmer vol vnd daz ander Symon sin veter von mir ze lehen habent, ob ich sterbe, gib ich dem vorgenanten closter vnd sampnvnge mit alle dem reht, als ich in ennev (?) sibenthalbev han bestetet ebichlichen nach meinem tode zebehalten mit der bescheidenhait, daz si sev von den nimmervolln mit chavffe oder mit bet e zerledigen, die weile aber des niht geschieht, so svln die zwene nimmervo^elln nach minem tode von dem probst vnd von der sampnvnge dez vor genanten closterz div selben zwai lehen entphahen, als lehens reht ist; dar zv daz fordorf ein volgvltiges lehen, daz dem probst vnd dem vorgenantem closter von mir stet fvnfzehen phvnt phenning passawer mv^ensse, daz ich ledichlichen gib vnd aigenz dem vor genanten closter vnd der sampnvnge Ebichlich ze haben also mit bescheider rede, daz der probst, der nv ist vnd nach im chvmftich wirt, von dem vorgenantem gvt datz fordorf, waz iz tiver ist denn die fv^enfzehen phvnt, zwelf herren mir vnd miner nachchvmft zv ein ebigen sele raet iedem herren alle samptztage durch daz iar ebichlichen zv siner pfrv^enpht zwai aier sol geben, vnd offen avch daz, daz zv dem vorgenantem gvt die sampnvnge dez vor genanten closterz vnder in sol erwellen einen herren, der dez vor genanten gvtz stiffter vnd storer si, vnd daz selbe reht den prv^edern mit gewissen an lege ze pezzervm irer phrvnht, daz ich Ortneit von Tannberch vnd min geben (sic) dez vor genanten gvtes gwer svln sin vns an allen nvtz vnd dem chloster an allen schaden. Daz div rede stet vnd gantz vnd vntzebrochen beleibe, dar vber gib ich Ortneit von Tannberch disen brief versigel mit mit (sic) minem insigel. dez ist zevge chalhoch von valchenstein, Ch. von valchenstein, H. von valchenstein, Orttolf von Marspach vnd biderber levt genveh. der brief ist gegeben, da von christes gebu^erte sint zergangen tavsent jar vnd driv hundert jar, dar nach in dem zwaivndzwaizichsten jar an vnser vrowen tach der liht messe.

Source Fulltext: OÖUB 5 (Wien 1868), S. 316-317, Nr. 325