Ich Hayme Hern Gebolfs svn vnd ich Chvnrat sein brueder vnd ich Elbel sein brueder Hern Perichtoldes dez Turings svne vnd vnserr Erben wier verjehen vnd tuen chvnd alle den, die disen brief lesent oder horent lesen, di nv sind vnd her nach chvmftig werdent, daz wier vnsern (sic) guet, daz wier haben gehabt am geroltzveld, daz vnserr Reichtz aygen ist gewesen, ein wismat vnd ein Holtz, daz wier daz selbe guet ze Chouffen haben geben den Erbern Purgern dacz wienn Hern wilhalmen bey dem Prunne vnd Hern Pilgrimen an dem Chienmarcht vmb zwaynn achtzig Pfvnd pfenning wienner Mvˆntz, der wir Reicht vnd gaentzleich gewert sein, vnd dvrch pezzer scherm hab wier gebeten vnsern Herren Hern Christann den Truchsoeitzen van Lengbach, daz der dez selben guetes schol Reichter herre vnd scherm sein fuer all ansprach, als dez Landes Reich (sic) ist jn Oesterich. vnd ich vor genanter Hayme hern Gebolfs svn vnd ich vor genanter Chvrat (sic) sein brueder vnd ich vor genanter Elbel sein brueder Hern perichtoldes svne bayd dez Tvrings Loben daz vnserm Herrem Hern Christann Truchseitzzen van Lengbach, waz er dez vor genanten guetz schaden nimbt, vnd er sein herre vnd scherm ist, daz schol er haben ovf alle diw, vnd wier in dem Land ze Oesterich haben, Ez sey an aygen oder an lehen oder an vrbarn oder swie ez genant ist. wier Loben in ovch daz vnsern vor genanten Herrem Hern Christann dem Truchseitzzen van Lengbach waz im an vnserm vatern Hern Perichtoldem dem Turing vnd an vnsern swestern ab geit, daz schol er haben ovf alle dew, vnd wier vor genanten ich Hayme vnd ich Chvrat (sic) sein brueder vnd ich Elbel sein bruder in dem Land ze Oesterich haben. Daz disew Red staett vnd vnzebrochen beleib, da gebe wier vber vnsern vorgenanten Herrem Hern Christann Truchseitzzen van Lengbach disem (sic) brief ver sigelt mit vnsern drin hangvntden Insigeln ze ainen Offen vrchvnde vnd ze ainem waren gezewg diser sache. Der brief ist gegeben dacz wienn jn der stat, do van Christes gebuert ergangen waren drewczehen hvndert Jare, dar nach in dem drew vnd zwaingisten (sic) Jare an sand vrbans tag.

Source Fulltext: OÖUB 5 (Wien 1868), S. 359-360, Nr. 365