Ich Graf Wylhalm von Schaunberch vergih vnd tu°n chunt an disem brief allen den, die in sehent oder ho^erent lesen, Wan der Edel Graf Albrecht von Go^ercz vnd von Tyrol mir sein tochter Graeuin Elsbeten ze einer êchonen geben hat mit rat seins vettern des hochgeborns fu^ersten chunig Heinrich von Beheim, Herczog in Chernden vnd seiner o^eheim des (der) Edlen Grauen Otten vnd Graf Albrechten von Ortenburch, so hab ich ir vnd den vorgenanten herren, die daz gelu^ebd an ir stat in genomen habent, bei meinen trewen ze legen in daz Lant ze Chernden czwey tausent march lo^etigs silbers wienner gewigtes ie czwen vnd sibenzch gu°ter grozz Prager fu^er die march cze reiten vnd sol daz gu°t antworten den vorgenanten Graf Otten vnd Graf Albrechten von Ortenburch vnd meinem swager herrn Otten von Lyechtenstein, vnd swelher der nicht enwaer, so sol ichz den andern antworten. Waer auer, des got nicht enwelle, daz si all nicht enwaern, swer dan von vnser baider vreunt baidenthalb dar zu benant wrd, dem sol ich daz gu°t antwrten tausent march sylbers von sand Geo^ern tag, der schierist chumt, v^eber ein iar vnd von dan auer v^eber ein iar auf sand Geo^ern tach tausent march silbers des gewichtes, als vor gesprochen ist. vnd daz ich die werung also volfu^er, dar vm hab ich cze mir cze pu^ergen gesetzt meinen vettern Graf Chunraden von Schaunberch vm zwo hundert march sylbers vnd die vorgenanten Graf Otten vnd Graf Albrechten von Ortenberch ir ietwedern vmb zwo hundert march silbers, hern Heinrichen von Hohenloch vmb zwo hundert march silbers vnd meinen Swager hern Otten von Lyechtenstein vm zwo hundert march silbers, hern Chunraden von aufenstein vm zwo hundert march sylbers, hern Herdegen vnd hern amlreihen von Pelav ir ietwedern vm zwey hundert march silbers, hern Heinrichen den Gralant vm hundert march silbers vnd hern Go^etfriden den Truchsner vm hundert march silbers mit so^elhem geding, swelher v^ender den ab gieng in der vrist, so sol ich iner zweien mano^eden zehant dar nach, swan ich gemaˆnt wrd, einen als gu°ten setzen an des selben stat. Taet ich des nicht, so sol ich einen Ritter oder einen Rittermaezzigen chnecht mit zwein phaerden ken vo^elchenmarcht oder ken sand Veit in die Laistunge senten, der da laiste in rechter geisel weis als lang, vncz ich einen andern als gu°ten pu°rgen secz, als vor genant ist. Waer auch, des got nicht enwell, daz ich die werung auf die tag nicht volfu^ert, als vor geschriben stet, swenn dann mein vorgenanter herr von Chernden oder mein sweher Graf Albrecht von Go^ercz oder sein sun Graf Albrecht die pu°rgen manten, so su^eln die pu°rgen czehant dar nach in czwein mano^eden ie der man selber in die laistung varn oder einen Ritter oder Rittermaezzigen chnecht mit zweien phaerden senten gen Vo^elchenmarcht oder gen sand Veit vnd su^eln die laisten in rechter geiselweis, vncz daz ich die werung gaenczleich volfu^er. Ez ist auch getaidingt, daz die vorgenante Graf Ott vnd Graf Albrecht von Ortenburch vnd mein swager her Ott von Ljechtenstein, den ich daz gu°t antworten sol daz selb gu°t nicht an legen su^eln dan nach meins vorgenanten herren von Chernden vnd meins swehers Grafen Albrechten von Go^ercz, vnd seins sunes meines swagers Grafen Albrechten des jungen von Go^ercz rat vnd willen, dar nach vnd ez mir vnd meiner vorgenanten hausvrawen nuez vnd gu°t ist. vnd daz daz also staet vnd vnuerbrochen beleib, han jch vnd wir vorgenanten pu^ergen, des wir veriehen an disem brief gemainchleich, geben disen offenn brief cze vrchu^end vnd warhait der vorgeschriben sach vnd taiding versigelt vnd veruestent mit vnsern anhangenden jnsigeln. Daz ist geschehen dacz sand Veyt nach Christes gebu^erd dreuezehen hundert iar, dar nach in dem vierdem vnd czwainzgstem iar des Ertags nach sand Gerdruten tag.

Source Fulltext: OÖUB 5 (Wien 1868), S. 378-379, Nr. 384