Ich Hainrick der Stainpekche vergich Offenbar an disem Prief vnd tu^en chunt allen den, die in an sehent oder ho^ernt lesen, daz ich mit verdachtem mv^et nach meiner frevnde rat vnd mit gu^etem willen aller meiner Erben vnd auch mit willen vnd gvnst Hansen Chu^etzchouen, zu° des Tochter ich meinen Sv^en beheyrat han, meinen genaedigen Herren von Schovnberch Graf Hainreichn vnd allen seinen Pru^edern auf gegebn han mein rechtes aigen, als ez her nach geschriben vnd benennet ist: in der Habe drev gu^et, ze Strazhaim vier gu^et, datz Strazz ein gu^et, in der Rydmarch ze Ru^edolfssteten ein Hu^ebe also mit der beschaiden, daz si vnd ir Erben mir vnd allen meinen Erben geleichs Sv^enn vnd To^echtern die selben gu^et her wider ze rechtem Lehen verleihen habent. vnd daz daz meinen lieben vorgenannten Herren vnd ir Erben also staet vnd vnzebrochen beleibe, dar v^eber ze einem v^erchv^ende gib ich in disen Prief mit meinem Insige! vnd mit Jansen Chu^etzchouen Insigel versigelten, der ze den Zeiten meines Sv^ens vnd seines gutes pfleger gewesen ist; vnd ist daz geschehen in der Vasten des Sv^entages Letare, do man zalt von Christes gepurt Dreutzehen Hvndert jare vnd dar nach in dem fu^emf vnd zwaintzgistem jare.

Source Fulltext: OÖUB 5 (Wien 1868), S. 421, Nr. 422