Ich weichart der Richter von weizzenpach vnd ich Geisel sein hausvrowe wir veriehen vnd tvn chvnt allen den, die disen prief lesent oder horent lesen, Daz wir vnverschaidenlich gelten suln Lesiern dem iuden von friesach vnd seiner hausvrowen Twora vnd irn erben Drev phvnt vnd sechtzich phenninge wienner mvnze, do von dem hivtigen tage gesvch avf get avf iglich phvnt Sechs phenninge alle wochen. Si svln paide havpgvt vnd schaden haben avf vns vnd avf allem vnserm gvt, daz wir haben in dem lande ze Osterreich; vnd swenne si havpgvt vnd schaden niht lenger paiten wellent, so svln wir si irz gvtes weren; tvn wir des niht, so sol ich weichart des naechsten tages dar nah ze wienne in ein erber gasthavs varen da mir Lesier der iude vnd sein hausvrowe Twora vnd ir erben hin zaigent vnd sol da inne ligen, als inligens reht ist vnd niht avz chomen, si werden paide havpgvt vnd schaden gar gewert; daz lob ich mit meinen triwen. Iz get avh gesvch auf die vorgenanten phenninge, ich lige inne oder niht, vnd svln wir si vmb daz selbe gvt weder hincz hof noh nindert alswo schaffen, denne daz wir si selber irz gvtes weren svln, daz lob ich mit mein triwen vnd geben in dar vber disen prief versigilt mit vnserm insigil. Diser prief ist geben nah Christes geburt drevtzehen Hvndert iar in dem Sechs vnd zwaintzgisten iar, dar nah An sand Polikarpen tage.

Source Fulltext: OÖUB 5 (Wien 1868), S. 445-446, Nr. 445