Ich Chvnrat von Tannenberch vnd ich alber von Streitwisen wir veriehen baide offenlich mit disem brief vnd tvn chvnt allen den, die in an sehent lesent oder ho^erent lesen, daz wir vmb die gnad, die vns die hochgelobten fürsten vnser genedig herren chvnig friderich von Ro^em vnd sein bru^eder die edeln hertzogen ze Osterrich vnd ze Styr getan habent an der purge ze Tannenberch, die sie vns wider gelazzen vnd gegeben habent, in gelobt haben vnd dez geswaren ze den heyligen vnd verpinden vns dar zv^e mit disem brief, daz wir in vnd ieren erben, die weil wir leben, mit der selben purge ze Tannenberch warten svllen ze allen ieren no^eten vnd sie vnd alle ir diener dar auf vnd dar ab lazzen, swenn vnd gegen wem sie dez bedûrfen, vnd sol in ouch von der selben veste chain schade geschehen, daz loben wir fûr vns baide vnuerschaidenlich vnd fûr alle vnser erben, ez sein svn oder tochter, vnd wer, daz wir von ettleicher sache wegen die vo^ergenanten pu^erch ze Tannenberch wûrden verchymmern oder a^endern, daz sv^ellen wir mit vnser vorgenanten herren chvnig friderich vnd seiner bruder wizzen vnd willen tvˆn. wer ouch, daz wir erben gewunnen, die zv ieren tagen vnd zv ir bescheidenheit cho^emen, mit den svllen wir schaffen, daz sie sich der selben gelubd verpinden gen vnsern vorgenanten herren vnd ieren erben, als wir an disem brief getan haben, vnd des ze ainem offen vnd warem v^erchvnde geben wir in disen brief versigelt mit vnsern jnsigeln, Der ist geben ze Chrems, da man zalt von Christ gebu^erde drevtzehenhundert jar, jn dem siben vnd zwaintzigstem jar an sant Margreten obent.

Source Fulltext: OÖUB 5 (Wien 1868), S. 488, Nr. 490