Wir Heinrich, Ott vnd Hainrich von Gots genaden Pfallentz-Grafen ze Reyn vnd Hertzogen in Baiern veriehen offenbar an dem brief, Wan wir nv gewesen sein ze den Siegen, daz vnser frawen stift ist, gelegen an dem wald vnd haben da an gesehen dev grozzen armmv°t vnd notichait, die der Probst vnd die Bru°der des selben Gotshauses leident vnd auch tragent. Nv haben wir dvreh got vnd dvrch vnser frawen willen ze voderist vnd dvrch vnser vnd vnserr voruodern hail vnd Saeld mit gu^eter gewizzen nach vnsers Rates Rat gegeben ze Stewer dem selben Gotshaus ain pfunt weytes vnd vier pfvnt chlaines saltzes, daz der Probst vnd die Bru^eder daselben, die ietzu° da sint oder fu^erbaz dar choment, ewichlichen ze ainem mal in dem jar verfv^eren svllen freyˆ vor aller Mavtt vnd zoll ze Perchausen vnd auch ze Schoerding, Vnd sol auch si an der oben genanten freyung, dev wir in ewichlichen gegeben haben, dhein vnser amptman dar an nicht irren. Vnd dar vber ze einem vrchv^end vnd ze einer bestaetichait geben wir in den brief versigelten mit vnsern jnsigeln. Der ist gegeben ze Pvrchausen, Do man zalt von Christes gebvrtt Drevtzehen Hvndert iar vnd dar nach in dem Siben vnd zwaintzigisten iar an Sand Vrbans tag.

Source Fulltext: OÖUB 5 (Wien 1868), S. 479-480, Nr. 482