Ich Jans van Chappell vergich an dem brief vnd tuen chunt allen den, di in sehent oder ho^erent lesen, Daz ich mit wol bedachtem muet nach rate miner vreunde Den Chriech, der zwisschen mir vnd minem O^ehem van winchel hern Albern Chorherren ze Pazzow vnd weichharten sinem bru^eder gewesen ist, Gesaczt han an alle w^ertzicht vnd an geuerd an Albern van Chu^enring, Steffan van Havnvelde, Chadolten van Ekhartsaw, Hadmarn den Stuchsen. Jansen van Chu°nring, Jansen van Merswanch In sogtaner mazze, was die vorgenanten herren an minem tail dar an geschaiden habent, daz ich daz gaentzlich sol staet haben vnd volvv^eren. Dar v^eber habent si geschaiden, Daz ich vnd alle mein Helfer Miner O^ehem van winchel vnd aller ir Helfer gantzer friunt sein sol lautterlich an geuerd vnd an alle arg liste vnd waz si mir van in geschaiden habent, daz sol ich w^er guet haben, an daz mir vnd minem O^ehem Jansen van Chu°nring in vriden geschehen ist, da wr vns her vlrich van waltsse gehaizzen vnd gelobt hat, daz habent si auzgenomen, alle ander schidung sol ich staet haben vnd volvv^eren. Tuen ich des nicht vnd daz vberuar, so sol ich den vorgenanten schidleu°ten schuldich sein ze geben Tausent march Silbers wienner gewichtes vnd sol ich vmb daz vorgenant Silber, wann mich der vorgenanten herren der schidleu°t ainer vordert, in varn hintz wienne in ein erber gasthous, da si mir hin tzaigent, vnd sol da innligen, als innligens recht ist, vnd nicht auz chomen vntz ich si des silbers gaentzlich verrichte vnd gewer, daz han ich gelobt mit minen truven. vnd dar vber ze, sichtigem getziug vnd offner vrchu°nd gib ich den brief mit minem Insigel vnd mit der vorgenanten herren insigeln versigelt, di der sache getziug sind vnd si vertaidingt vnd verrichtet habent. Der brief ist geben ze Tuln, da van Christes gepurt warn ergangen Drevtzehen Hundert Jar, in dem Siben vnd zwaintzigistem Jar an dem Pfintztag nach des Heiligen chrev°ces tag, als ez vvnden ward.

Source Fulltext: OÖUB 5 (Wien 1868), S. 478-479, Nr. 481