ICH Hanns der ofen vnd all mein Eriben veriechen vnd tun kund offenlich mit dem brief allen den, dj in sechent, horent oder lesennt vmb dj vngnad, dj ich verdient vnd verhandelt hab gegen dem Edlen Wolgeborenn meinem lieben gnadigen Herren graf hainrichen von Schawnnberg, Darumb ich in sein vancknu^es komen pin; da hatt mein herr von Schawnberg angesehen gross pett, dj der hochgeporenn furst vnd herr Hertzog lewpolt von Osterreich von mein wegen getan hatt, vnd des Edlen herrn pett Herrn Hansen von Trawn vnd hatt mich von der vancknuss taidingen lassen also mit ausgenomen wartten, das ich vnd mein Erben von derselben vancknus vnd pessrung wegen dem egenanten von Schawnberg, seinen Erben, allen den sein nichts dester veinter sein sollen in kainerlay weis. Das geloben wir in bey vnsern trewn an aydes statt trewlich statt zu haben, das oben an dem brief geschriben stett. Mitt vrkund des briefs mit meinem obgenanten Offen anhangunden Insigl vnd mit des Erbern andres des pewnttner di zeitt phleger zw puechaim anhangunden Insigl, das er durich vnser vleissigen pett willen daran gelegt hat jm vnd sein Eriben anschaden. der brief ist geben Nach kristi gepu^erd drewzechenhundertt, Darnach in dem achtt vnd zwainzigistenn jarenn an sand Mathias tag des heyligen XII potten.

Source Fulltext: OÖUB 5 (Wien 1868), S. 504-505, Nr. 507