Wir hainrich von gots genaden pfalczgrafe ze Rein, herczog in Bayren veriehen offenbar an dem brieff, das wir Sweickern von Sa^eldenaw vnserm vicztum bej der Rot vnd Magensen vnserm Ritter von dem Newenmarckt vollen gewallt gegeben haben, wa sy vberal in vnserm gericht ze weilhardt von vnserm vrbar finden mu^egen achczehen pfundt salczpurger pfenning gult, das sie die von vnsern wegen vnd in vnserm namen geben vnd antwurten sullen zu dem alter, den wir gestifft haben zu Maurkirchen vnd darumb zu vrchunde geben wir in den brieff mit vnserm jnsigel besigelten. der brieff ist gegeben ze lanczhutt Millesimo cccmo vicesimo Nono an vnser frawen abent in der vasten.

Source Fulltext: OÖUB 5 (Wien 1868), S. 538, Nr. 538