Wir Emch von Altzay Probst ze werdsê, fridrich von Walsè, Chunrad der Purgraf von Sewsenekke, Ru^eger von Zauche vnd Alram von Rikkerstorf tu^en chunt vnd veriehen allen den, die diesen brief sehent oder ho^erent lesen, Daz wir gemainlich alle fu^emf habn verschaiden vnd verrihtet vnsern herren Bischof Chunraden von Frising vnd hern Berchtold von Losenstain vmb alle die sache, die si mit einander ze schaffen vnd ze handeln heten, als ir diner, vmb swelich sache daz was, an umb vischwaide, an ligent gu^et, an lehen vnd an Bu^ergschaft, dar vmb habn wir nichts geschaiden noch berihtet, noch ward auch dar vmb nichtes an vns geseczet, vmb ander sache vnd vorderung, die si gen einander heten, dar vmb habn wir su^e berihtet vncz v°f den hev°tigen tag, daz baidenthalb allev° vorderung ab sol sein. Wir habn auch verrihtet vnd vertaidingt Chu^enrats sa^eligen chinder des Zauchingers, sin bru^eder vnd ander sin frev^ende vmb den to^edeslag Chu^enrats sa^eligen des Zauchinger vnd vmb alle vintschaft, dev si heten gen des vorgenanden Bischof Chu^enrats dinern, gen sinen burgern ald gen andern sinen lu°ten, vnd sint dar vmb aller der frevnde worden, der vinte si dar vmb worn vnd gen den si vintschaft heten vnd habn daz gelobt bi ir trewen an aides stat. Chu^enrats des Zauchingers sa^eligen bru^eder vnd sin sun hant auch verhaizzen vnd verlobt bi ir trewen, swenne Chu^enrats sa^eligen chinder ze ir tagen choment, daz su° mit inen schaffeu su^ellen, daz sv° auch frevnde werden vmb ir vater vnd vmb alle vintschaft. Si hant auch verhaizzen vnd gelobt bi ir trewen, swenne Chu^enrats sa^eligen Bru^eder Pilgrim wider ze lande chome, daz si schaffen sullen, daz er auch frevnde werde vmb alle vintschaft, als auch si worden sint. wolde er des niht tu^en, so su°llen si im vnbeholfen sin noch zv legn. wir habn auch verschaiden, daz vnser herre der obgeschriben Bischof Chu^enrad sol gebn Chu^enrats sa^eligen chinden des zauhingers sechs vnd drizzig pfunt alter wienner, daz ir ainez beraten werde, die pfenning er in auch hat vergwisset vnd gu°t gemachet, da wir alle fûmf bi worn. Daz habn wir allez verschaiden vnd berihtet alle fûmf vnzerworfenlich, wan si vns baidenthalb ze schiedlu´ten vnd ze gemainen lu´ten dar zv° namen mit ir gu^etlichem willen. Daz daz allez, daz hie vorgeschriben stat, gantz, sta^et vnd vnczebrochen belibe, dar vmb habn wir disen brief besigelt mit vnsern jnsigeln. Der brief ist gebn ze Sitansteten, do von Christes gebu^ertte worn drevtzehen hundert jar vnd dar nach in dem newn vnd zwaintzkisten jar des na^echsten samcztags vor dem Suntag, so man singet judica.

Source Fulltext: OÖUB 5 (Wien 1868), S. 538-539, Nr. 539