Jch Chalhoch der Hauser vergich vnd tvn chund allen den, di nv sind vnd her nach chvnftich werdent, di disen prief an sehent lesent oder hornt lesen, daz ich mit wolbedachtem mvt vnd mit gutleichem willen aller meiner erben vnd nach meiner vreund rat gesazt han ledichleichen meinen Hof datz Chemnatpach, meinem vetern Vlreichen dem Hauser vnd allen seinen Erben mit alle dem recht, vnd ich in han inn gehabt, fu^er vier vnd vierzich phunt alter wienner phenning, der ich gantz vnd gar bericht pin an allen schaden, mit sogtaner beschaidenhait, daz derselb vlreich der hauser vnd sein erben irn frvm schaffen schulten mit demselben satz ze versetzen oder ze geben, wem si wellent, ze alle dem recht vnd siv in inn habent, fu^er di vorgenanten vir vnd virzich phunt phenning an alle widerred vnd an alle irrung mein vnd aller meiner erben vnd schol auch die losung desselben hofs sein jaerleich ze weynachten vmb alt phenning vnd pin auch ich Chalhoch der hauser vnd alle mein erben desselben hofs vnd des satz dar auf des vorgenanten vlreichs des hauser vnd aller seiner erben, vnd swer den satz inn hat, gwer nach landsrecht, gieng in daran icht ab, wigetanen schaden siv des nement, den schullen siv haben auf aller der hab vnd ich vnd mein erben haben in dem land, versu^echt vnd vnuersu^echt. Vnd dar umb, daz disev red staet vnd vnzebrochen beleib, so gib ich chalhoch der hauser dem vorgenanten vlreichen dem hauser vnd allen seinen erben vnd dem, der den satz inn hat, diesen prief bestaetigt mit meinem jnsigel zv einem gezevg vnd waren vrchund. Des siud gezevg her vreytel von winthag, her Ott der hauser, her Ott der chvleuber, Hainreich der Jmpzinger, Herweich der holtzer, wetzel von oerbing, Herweich der engelpoltstorfer vnd ander pidber laeut genu^ech, den di sach wol chund ist. Der prief ist geben, do man zalt von christs gepvrd drevzehen hundert Jar, darnach in dem dreizzigistem Jar des nachsten Sv^entags vor sand Gyligen tag.

Source Fulltext: OÖUB 5 (Wien 1868), S. 585-586, Nr. 584