Jch Matz di Liupoltz pu^ezzer witib vnd ich Leb vnd Ott vnd Leupolt di pu^ezzer ir sun vnd ich arnolt gozzeins svn vnd mein housfrow Ludmei vnd alle vnser erben wir veriehen vnd tu°n chunt allen den, di disen brief sehent, lesent oder ho^erent lesen lemtigen vnd chumftigen, daz wir redleich vnd reht mit wol bedachten mu^et vnd mit aller vnser erben gunst vnd willen vnd mit gerichtz hant ze chouffen haben gegeben vnser hous Seiftenekk, daz zwischen des Bischolfs hof leit vndz an Christans ayerimsmaltz hous gar vnd gaentzlich mit samt dem pachhaus vnd swaz da zu gehort, besucht vnd vnbesucht vnd sam wir iz in nvtz vnd in gewer gehabt haben mit samt dem grunt vnd mit aller stat zv^e rechtem purchrecht dem erbaern fursten bischolf Friderichen vnd allen seinen nachchomen vmb sechtzk pfunt alter wienner pfenning, der wir gar vnd gantz gewert sein, wir sullen ouch desselben houss sein vnd seiner nahchomen gewer sein für all ansprach, sam purchrechtz reht ist in der stat ze Lintz. oder na^em sev dar vber chainen schaden an dem selben hous, den sullen wir in ablegen vnd sullen den haben auf vns vnd auf allem vnserm gut vnd wir haben, daz dem ersamen fursten bischolf Friderichen von Salzburch vnd allen seinen nahchomen von vns di red staet vnd vnzebrochen von vns beleib, dar vber geben wir disen brief gesigelten mit der stat jnsigel ze Lintz. Des sint gezeug Hainrich der Tungozzinger, Friderich der Tungozzinger, vlrich vnd Dietrich, di pranter, bruder wolfhart, mathe der paeschinger, Ditmar in dem Lonstarfhof, Mathe vnd Christan di hornborst, christan der ayerimsmaltz vnd Simon sein svn vnd ander erbaer laeut genuch. Der brief ist gegeben nach Christes geburd dreuzehen hundert iar darnah in dem ains vnd dreizikisten iar, nach O^estern vber vierzehen tag.

Source Fulltext: OÖUB 6 (Wien 1972), S. 10f., Nr. 9