Jch Symon der Nymmeruol vegich vnd tv^en chunt allen den, di disen prief sehent, oder ho^erent lesen, Daz ich mit verdachten mu^et vnd mit gu^eten willen han verseczet Probst Vlreichen vnd den prv^edern und dem Gotzhaus datz sand Marein Slag drev volgu^eltigev gv^et di obristen datz dem Nevndorf mit meins herren hant hern Jansen von Morspach, von dem ich dev selben gv^et ze rechten lehen han gehabt, ze holtz vnd ze velde, versu^echt vnd vnversvcht vmb ein genantz gv^et, als meins vorgenanten herren Hantvest sait, mit der beschaidenhait, ob ich immer so stathaft wurd, daz ich ze chauffen hiet vnd gechauffen mo^echt, daz mir die vorgenanten pru^eder di oftgenanten gv^et ze lo^esen oder ze chauffen svllen geben vnd anders niemant, vnd han auch ich gelv^ebt mit gesworen aid vnd mit meinen trewen, daz ich dez satz auf den vorgenanten gv^eten gewer sol sein wider aller maenichleich, swo oder swie oft sein den egenanten prv^edern vnd dem Gotzhaus no^et vnd durft gesehiecht. Vnd daz di red vnd di gelv^eb von mir vnd von meinen erben staet vnd vnzebrochen beleib, dar v^eber gib ich disen prief versigelten mit hern Sighartz vnd hern Rv^egers ab dem Perg jnsigeln, wan ich aygens jnsigels nicht enhan. Dez sint gezeug her Ortneid vnd her Chvnrat von Tannberch, her Chalhoh von Getzendorf, wernhart vnd Philipp di Schenchen, her wolfhart der Pfarrer von Serleinspach, jrnfrid der Streitwitz, Pentz der Schaffer von valchenstayn, vlreich der Richter von Rorbach, vlman vnd v^ell sein svn von woykendorf vnd ander erberr lev^et genv^eg. Der prief ist gegeben, do man zalt von Christes gebvrd Drevtzehen hvndert jar vnd darnach in dem ayns vnd dreistkisten jar an sand Jo^ergen tag.

Source Fulltext: OÖUB 6 (Wien 1972), S. 14f., Nr. 13