Wir Ott von gotes genaden pfalczgraff ze Rein vnd herczog in Bayren ueriechen offenbar an dem brieff vnd thun chundt allen den, die in an sehent oder horent lesen, wann vnser vater vnd vetter vnd all vnser voruodern saligen das goczhaus ze Maurkirchen mit besundern andachten vnd diensten in den ern vnd wirden der hochgelobten magt Gots muter sand maria vnser frawn alle zeit gehabt habent, Als wir chuntlich vnd aigenlichen erfunden haben an den briefen vnd hantfesten, die vnser frawn pfarrer vnd Caplan da selben von vnsern voruordern vncz her gehabt habent, vnd wann wir salig vnd gut weg, die vnser voruordern in gotes vnd seiner lieben muter dienst habent gehabt vnd gehandelt, pilleich vnd auch gern durch vnser vnd gemaincklich durch aller vnser voruodern vnd nachkomen ewigs hail vnd sa^eld wellen pessern, meren vnd nicht mindern, Haben wir yeczod besunderlich angesehen vnd erchandt die genad, die vnser frawn pfarrer vnd Caplan ze Maurkirchen von vns vnd von vnsern voruodern habent gehabt, Als vns her Ortolff der Teuffenpeck, der nw pfarrer daselb ist, mit vnsern vnd mit vnsern voruodern hantfesten vnd briefen beweist vnd geinndert hat, Vnd haben dem selben her Orttolff dem Teuffenpecken, der manige jar vnd zeit, ee er gen Maurkirchen ye kam, vnser besunder caplan ist gewesen vnd noch ist, getan die genad, Daz wir wellen, das er alle die genad vnd recht sol haben, die sein voruoder her hilprant der weichsselberger vber al in vnserm landt an allen steten hat gehabt, vnd wan der selb teuffenpeck vor vnser besundrer Caplan ist gewesen, haben wir in als seinen voruodern hern hillprant sa^eligen yeczod von newen dingen zu vnserm besundern Caplan genomen Also, das wir wellen, das er vnd sein diener haben alle die recht, die vnser Capplan habent, die taglichs pej vns sint an vnserm tisch. Vnd darzu freyen wir im sein haws vnd sein diener vnd alles sein jngesinde vor allem vngewonlichen vnd vnpillichem gewalt vnd wer von vnczu^eehten darzu vnd darein geflochen kumpt. vnd welicher vnser ambptman oder der vnsern das vber fu^er im zu laid oder nicht sta^et hielt, der sol wissen vns daran gelaidigt haben vnd daran wider vns getan haben, wir thun im die genad auch, das er die hoffstatt zu Maurkirchen, die der vo^egler gehabt hat, vnd den garten, der darzu gehort, vnd den hoff zu Tettenpach, die vnser aigen sind vnd die gult da von vns gefallen solt an sand Michahels tag, die sol er haben an all vnser vnd vnsrer amplewt vordrung, die weil er lebt Also, das kain pischoff ze passaw oder kain sein nachkomen noch seinem tod dar auff gen vns icht hab zu sprechen. Darzu haben wir vnser frawen zu lob vnd zu ere vnd auch ze dienst getan, das wir wellen, das der selb teuffenpeck die genad vnd freyung sol haben, was er von wein, Salcz, getraid oder von andern sachen zu kost bedarff in sein haus, das im das frey vnd ledig fur sol gen an alle zo^ell vnd Mautt vnd an alle vordrung vber al in vnserm land vnd herrschafft an allen steten, das er den gotsdienst desterpas mu^eg volpringen vnd volfurren. Darzu wellen wir, das er hab zwen fischer an der Ma^ettich, in vnsern wassern trewbach, Rospach vnd Mospach, als die sein voruoder gehabt hat. Darzu wel wir auch, das im vnser ja^eger, welchen er nimpt, alle iar vell vnd antwurt ein Rottwilt zu den Dreyssick messen, die er beget an dem achtenten tag nach vnser frawen tag ze der Schiedung, vnd des die ja^eger gen vns vnd vnsern amptlewten an leib vnd an gut vnentgolten beleiben, wir tun auch im die genad, das wir wellen, das kein fischa^er sol siezen dacz Maurkirchen dann sein zwein fischa^er, die wir im erlaubt haben. Darzu tun wir im auch die genad, das er nem ausz vnserm Schachen prennholcz, wie vil er bedarff in seinem haws. wir haben auch im die genad getan, das wir wellen, das kain vnser ambptman vnser frawen lewt beswa^er mit kainerlay werckhart. wann vnser frawen pilgrein ze Maurkirchen icht rechter chauff wider get, wellen wir, das niemant chainen chauff da hab weder trucken nach nassen, es sej dann mit des vorgenanten her ortolff des Teuffenpecken pfarrer daselben willen vnd gunst. wir wellen auch, wenn ein pfaff in seinem erczpriester ampt Tod leit, das chain vnser amptman noch anders yemant mit seinem gut ichts zu schaffen hab, wann wir wellen, das es seinen geltern, seinen frewnden vnd seiner sel gevall. Vnd da von wellen wir vnd gepieten allen vnsern amptleuten, vicztumen, Richtern, Mauttern, zollern vnd wie sy genand sind, vnd gemaincklich allen den, die in vnserm land vnd herschafft gesessen sind, Edeln vnd vnedeln vesticklich vnd ernstlich bej vnsern hulden, das sy im die obuerschriben genad alle ga^enczleich sta^et haben vnd mit nichte vberfarn. Das wellen wir nicht enpern vnd als ir vnser swa^er, gross vngenad wellet vermeiden. Vnd das im die obgenandt gnad sta^et, gancz vnd vnzerbrochen beleiben, Daruber zu ainem vrchund geben wir im den brieff mit vnserm jnsigel uersigelten. Der ist geben zu O^etting, do man zalt von Cristes gepurdt drewczehenhundert jar, darnach in dem ainem vnd dreyssigisten jar an sand Michels tag.

Source Fulltext: OÖUB 6 (Wien 1972), S. 35ff., Nr. 30