Ich Dietrich der Chlewer zter zeit Mv^enzmaister ze Ens vergich offenbar an dem brief vnd tun chvnt allen den, die in sehent vnd horent lesen, Daz Chunrat der Tvncz zter zeit, do er es wol getun maht, seinem vetern Vrschalken Hainreich Wisent Sven zv chavffen hat geben sein halbev Schro^etstat mit allem nvcz vnd han ich e genanter Dietreich Vrschalhen die selbew halben Schro^etstat mit allem nvcz verlihem mit allem dem recht, als der mvnzze gewonhait ist ze Ens der Stat. Daz die red staet vnd vnuerchert peleib, dar vber gib ich iem den offen brief ze ainem waren Gezeug mit meinem Anhangvndem jnsigel bestaetiget vnd dar czue sint des gezeug Hainrich Wisent, Fridrich wisent, Dietrich der Nendinch, Fridreich der Tiernacher, Vlrich der fvnfchiricher, Ekhart sein prueder, Vlrich der Setzer, Reinpreht, Leupoldt dor . . . . . vnd ander erber Lewt genueg, den die red wol chunt vnt gewissen ist. Der brief ist geben, do von Christi geburd warn ergangen Drev Hvndert jar vnd jm Ainsvnddreizzigisten Jar des naechsten Montags (?) nah sant Cholomans tag.

Source Fulltext: OÖUB 6 (Wien 1972), S. 41, Nr. 33