Ich Chvnrat hern Rudolffs Svn von Eberstorff, Dem got gnade, Vergich vnd Tvn chvnt Offenlichen an disem Prief, Daz mich mein Sweher her vlreich von Pergowe vnsers herren Hofemaister Hertzog albrechts jn Osterrich vnd mein Swager her Perchtolt von Pergowe sein Pruder recht vnd redelichen verricht vnd gewert habent Hvndert phunt wienner phenninge an den vier Hundert phunden, Die sev mir gelubt haben zegeben ze widerlegunge vnd ze rechter Morgengab nach des landes rechte jn Osterrich ze meiner Havsvrowen seiner Tochter junchvron Petersen, als sev mir daz verschriben haben mit iren Prief, vnd sage sev furbaz der egenanten Hundert phunde aller dinge Ledich vnd vrei vnd daz dise rede also stete sei, des gib ich vorgenanter Chvnrat von Eberstorf jn disen Prief ze ainem offen vrchunde versigilten mit meinem jnsigel vnd mit hern Hainrichs jnsigel von Chranichperch, Der diser sache gezevg ist, mit seinem jnsigel. Diser Prief ist geben ze wienne nach Christes geburt Drevtzehenhundert jar, dar nach jn Dem Drev vnd Dreizzigistem jar an sand Gregorien Tage jn der vasten.

Source Fulltext: OÖUB 6 (Wien 1972), S. 87, Nr. 78