Ich Dietmar von Lobenstain vergich offenleich vnd tven chvnt an disem prief allen den, di in sehent, lesent oder horent lesen, di nv sint oder her nach chvmftig werdent, daz ich den beschaiden chnechten den Roten, Fridreichen, Otten vnd Nyclan dev genad getan han, swaz si rehter lehen von mier habent, swie die gvt genant sein oder swaz dar zve gehort, versvht vnd vnuersvht, ze holtz oder ze velt, wie ez genant sey, ob ier ainer vnder den drin stvrbe an erben, dez got niht engeb, so sol iz der andern zwaier reht lehen von mier sein, si haben getailt von ein ander oder niht getailt, waer aber, daz ier zwen an erben stvrben, dez got niht engeb, so sol iz dez ainen reht lehen von mier sein vnd sol avch in dar an dehain vngenad tven. Daz in di red steet vnd vnzebrochen beleib, gib ich in disen prief versigelt mit meinem anhangvnden jnsigel. Der red sint gezevg Her Chvnrat von Asperch, vlreich der Svltzpech, Chvntzel der Sinzendorfer, Seidel sein prvder, Ott der schech, Reicher von hoedring vnd ander piderb levt genvg. Der prief ist gegeben, do nach Christes gepv^ert warn ergangen drevzehen hvndert jar vnd dar nach in dem drev vnd dreistkistem jar an sant Mathyas tag in der vasten.

Source Fulltext: OÖUB 6 (Wien 1972), S. 86f., Nr. 77