Wir Albrecht von gots gnaden Herczog ze Österreich vnd ze Steir Vergehen vnd tun kunt offenlich mit disem brief, daz wir angesehen haben die pete, die vns die beschaiden lewt von hofkirchen getan habent vnd haben Ir grosse gebresten erkant, die Si vncz her geliten habent dauon, daz Si fro^embde me\arkcht, die In vngelegen sind, gesucht habent vnd haben In durch vnsers Lands kunftigen nutz vnd frumens vnd auch durch Irer bet willen die gnad getan vnd tun auch mit disem brief, daz Si furbaser ewigklichen ainen Markcht daselbs haben mu^egen vnd sullen ains in der wochen an dem Eritag vnd sullen Si auch mit allen den, die denselben Marckt su^echent vnd wandlung da habent, Si kauffen oder verkauffen, furbas alle die Recht haben, wie die genant sein, die all ander vnser Stet vnd Me\arkcht habent in vnsern landen. Wir haben auch den vorgeschriben vnsern lewten die gnad getan, daz Si furbas auf denselben Markchttag da verkauffen mu^egen funf phunt Salczes klainer Chu^efflein an alle Irrung vnd sawmung. Vnd des zu ainem offen vrkund vnd sicherhait geben wir disen brief besiglten mit vnserm anhangundem Insigl, Der geben ist zu Wienn, do man von Kristes gepurd zalt Tausent drewhundert Jar, Darnach in dem drey vnd dreissigisten Jar an sand Giligen tag.

Source Fulltext: OÖUB 6 (Wien 1972), S. 102f., Nr. 92