Ich Alber von Rauhenstain vnd mein Hausvrowe Chlar vnd ich Hoertel von Rauhenstain vnd vnser Swester Agnes mitsampt allen vnsern Erben veriehen vnd tv^en chvnt allen den, di disen brief sehent, lesent oder ho^ernt lesen, Daz wir gelten sv°llen vnsern lieben O^ehaimen Hainreichen, Reinbrehten vnd Fridreichen von walse vnd iren Erben Sehs Hvndert phvnt pfenning wienner mv^enzze, vnd fu^er diselben pfenning haben wir den vorgenanten vnsern Ohaimen vnd iren Erben geantwu^ertet vnd gesaczt vnsern tail an dem Haus ze O^ert bei Gmvnden gelegen vnd alles, daz darzv geho^ert mit allem dem nucz vnd dem reht, als wir ez e gehabt haben vnd von alter herchomen ist, ez sei Herschaft, Vischwaid, Gericht, vo^erst, wazzer vnd wi ez genant ist, ze holcz vnd ze Veld, versu^eht vnd vnuersu^eht, also beschaidenleich, Daz wir di vorgenanten vnser O^ehaim der vorgeschriben Sehs Hvndert phvnt pfenning verrichten vnd wem su^ellen an alle savmichait auf aller manne Vaschanch tag der schirst chvmt. tv^en wir des niht, wi daz chvmt, so svllen wir zwen Schidman nemen vnd vnser O^ehaim zwen, di paidenthalben vnser gemain vrevnt sein, vnd nah der vier manne rat sv^ellen wir den vorgenanten vnsern O^ehaimen den vorgeschriben vnsern tail an dem Havs ze O^ert mit alle dev, vnd darzv geho^ert, als vor auzgenomen vnd verschriben ist, ze chauffen geben vnd ander niemen, ob wir ez von vnser selber wegen niht verziehen mvgen, vnd sv^ellen si vns danne her zv geben nah der selben vier manne rat vnd mit vns wanden vmb den chauf, daz zwischen vns paidenthalben vrevntleich vnd zeitleich gesein mag, vnd verpinden vns auch, swenne der tag fv^er chvmt, daran di Losvng sein solt vnd wir niht gelo^eset hieten, so svllen wir dehainen gwalt fu^erbaz ze losen haben vnd sol anders daran niht geschehen, danne daz der Chauf slehtleich fur sich gen sol, als vor geschriben ist. vnd waz des Guts daz zv dem Haus ze O^ert geho^ert, hindan versaczt ist von vnserm tail, wellent daz vnser O^ehaim von walse lo^esen, des sv^ellen wir in wol gv^ennen vnd sv^ellen si daz haben vnd slahen auf daz ander in alle dem reht, als vorgeschriben stet. Ez habent auch zv vns gelu^ebt vnd sint porg warden her Alber von Chv^enring, jans von Chv^enring, Marchart von Mistelbach vnd weychart von winchel also, wanne der tag der vorgenanten Losvng vergangen ist, daz wir in daz Haus ze O^ert vnd waz darzv gehort vnsers tails, an allen furzug sv^ellen ze chauffen geben, als wir vns vor an disem brief verpvnden haben, wolten wir in daz mit dehainen sachen verziehen, so svllen die vorgenanten Porgen auf der stat, vnd si vnser O^ehaim von walse monent, Laisten in di Stat ze Ens ie der man mit drin Pherten vnd wer vnder den Porgen selb niht gelaisten mo^echt, der leg einen erbern Ritter oder einen Rittermaezzigen Chnecht auch mit drin Pherten an sein stat vnd sv^ellen di selben Porgen laisten, also reht ist vnd nimmer auzchomen, wir richten vnsern O^ehaimen den chauf auz vnuerzogenleich, als wir vor an disem brief gelu^ebt haben, vnd welher vnder den Porgen in der zeit sturb, des Got niht welle, so svllen wir einen als gv^eten an des selben stat legen, vnd naemen des darvber vnser O^ehaim dehainen schaden, den si bei iren trewen gesagen mvgen, den sv^ellen wir in ausrichten vnd sv^ellen si daz haben auf dem vorgenanten vnserm tail des Hauses ze O^ert vnd auf alle dev, vnd darzv geho^ert, vnd svllen si paide Haubtgu^ets vnd Schadens davon becho^emen, wi si wellent, mit vnserm gu^etleichen willen. Daz di red stet beleib vnd vnuerchert, darvmb vnd darvber geben wir in disen brief mit vnsern anhangvnden jnsigeln vnd mit vorgenanten Porgen anhangvnden jnsigeln bestetet vnd gevestent. Der Brief ist geben, do von vnsers Herren Gebu^erd sint gewesen Drevtzehen hvndert jar, darnah in dem drev vnd dreizzigistemjar des nasten Svntages vor sand Johannes tag ze Svnnbenden.

Source Fulltext: OÖUB 6 (Wien 1972), S. 97ff., Nr. 88