Ich Chvnigunt Otten Hausfrawe van Eingesse, dem got genad, vergich vnd tuen chunt allen den, die disen prief sechent oder horent lesen, die nu lebent oder hernach chumftig sint, Daz ich mit guetem willen vnd gunst meiner Erbern (sic) vnd zu den zeiten, do ich ez wol getuen mocht, han gegeben meinem Svn Micheln den Weingarten, der do leit an dem Pusenperig vnd ist gehaizzen in der Sechsen ze nachst der ledrerin van Alpeltawe, der wol fumzig phunt wer (sic) ist wienner phenning, vnd han im den uar genanten weingarten auf gegeben var her cholmann van Entzestorf zu den zeiten Perchmaister dosebs (sic) ze Etzestorf mit all dem recht, vnd ich in gehabt han vnd daz er in sol verchaufen vnd versetzen vnd allen seinen frumen do mit schaffen als im wol fueg; vnd wenn ich nicht mer ensei, des got enwell, so sol er nach meinem tod an alle dem Erib tail haben mit meinen chindlein, daz ich lazz hinder mein, vnd wenn ich aigens Insigel nicht enhan, so gib ich im disen prief versigelt mit des vargenanten perchmaister Insigel hern Cholmans van Etzestorf; dar zue sind gezeug Her Leudold van Stadelawe, Leupold der Amman ze Eingelsse, Jernfrid Amman zu Verlestorf, daz di sach stet vnd gantz beleib. Der prief ist geben Einglesse, da man zalt uan christes gepuerd Dreutzehen hundert Jar, dar nach in dem viervndreizzigistem Jar des Eritags nach Letare.

Source Fulltext: OÖUB 6 (Wien 1972), S. 114f., Nr. 107