Ich Albrecht der Volchenstorfer vnd jch Margaret sein Housvrow vnd jch Ott ier svn veriehen vnd tun chunt offenlich mit disem prief allen den, die in ansehent oder ho^erent lesen, Daz wier mit gutem willen vnd gunst aller vnser Erben vnd ouch mit zeitigem rate aller vnser vreunt vnd ze den zeiten, da wier ez wol getun machtten, verchauffet haben vnd ze chauffen geben haben vnser Vestt ze Sevsenburch, vnd allez, daz dartzv gehoret ze velde, ze holcze und ze Darf, gestift vnd vngestift, versuecht vnd vnuersuecht, wo daz gelegen sei vnd wie daz genant sei, vnd auch ze losen geben haben das Gut ze Greyn, daz vnser phant von den Hochgeborn fursten vnsern gnedigen herren Herczog Albrechten vnd Herczog Otten ze Osterreich vnd ze Steyr gewesen ist, den selben vnsern herren Herczog Albrechten vnd Herczog Otten vnd ieren Erben vmb Nevn hundert vnd funtfczig phunt phenning wienner munzze, darvmb si vns Hundert phunt Geltes auf ierem Vrbar in der Hofmarch, daz do gehoret ze der Veste ze Steyr, geseczet habent alle jar ab zeniessen also beschaidenlichen, daz vns der erber Ritter Ott der Hovser vnser vorgenanten herren der Herczogen Pu\argraf ze Steyr auf dem vorgenanten Vrbar in der Hofmarch die êgenanten hundert phunt Geltes auf der stat auzzaygen vnd ouch inantwurten auf gestiften Holden sol vnd sullen wier die nocheinander innemen als lange, vncz daz wier oder vnser Erben der vorgenanten Nevn hundert vnd fumfczig phunt phenning gar vnd genczlich gewert werden. Wier sullen ouch auf den selben Gu^etern, da vns die vorgeschriben Hundert phunt geltes aufgeschafft sint, weder mit Leuten noch mit gut, mit stiften, mit sto^eren, noch mit stevren noch mit andern sachen nichttesnicht ze schaffen haben. Wer aber, daz man vns nicht alle jar gebe Hundert phunt gelts, als vorgeschriben ist, welicher jares man vns danne daz versezze, so mugen wier wol vmb daz selb gut, daz vns versezzen wiert auf den gutern, da vns die egeschriben Hundert phunt geltes ausgezayget sint, wol gephenden mit der vorgenanten vnser herren der Herczogen guten willen vnd gunst. Wir sollen ouch noch dhainer vnser Erben gegen der vorgenanten Vestt ze Sevsenbu^erch vnd gegen dem Phande ze Greyn furbaz dhain chlag noch ansproch haben in dhainen weg, da mit wier gechlagen oder angesprechen mo^echten. Vnd des zv einem offenn vrchund gib jch vorgenanter Alber von Volchenstorf meinen egenanten Herren den Herczogen vnd ieren Erben disen brief versigelt mit meinem hangunden jnsigel, wan mein svn Ott ze den Zeiten nicht aygens jnsigels hette, Der geben ist ze Wienn, do man zalt von Gots gebu^erd Tausent Drevhundert jar, darnach in dem vier vnd Dreizzigisten jar an Phincztag noch sand Ambrosij tag.

Source Fulltext: OÖUB 6 (Wien 1972), S. 116f., Nr. 109