Wyr Albrecht vnd Ott von gotes genaden Herczog ze Ossterreich, ze Steir, Herren ze chrain, auf der marich vnd ze Partnnaw, Grafen ze Hablspurch vnd ze Kiburch vnd lantgraffen in obern Ellssassen vergehen offenleich vnd tun chvnd mit disem brieff, daz ein chrieg vnd ein stoss auf gestanden was zwischen vnssern burigern von Enns an aim tail, vnd zwischen Gmvndnern vnd andern vertigern (sic) am andern tail vmb daz Gmvndischs Salcz, daz dy Trawn ab get, daz di Gmvndner sprachen, daz daz Salcz fur sich abgen solt auf der Tvnnaw, vnd nicht gen Enns, vber denselben chrieg haben wir wesant vnsser Stet von wels, von Steir, von lyncz, von der vreinstat, vnd auch von Mathawssen, daraus die elstisten vnd di pessten vnd ander Iawt, Herren, dinstman vnd lantlawt, vnd haben vns an den erfaren, vnd habent di auch gesait bei irn trewn, daz von altter gwonhait, vnd auch ir voruodern gehort haben, daz dasselb Gmvndischs Salcz, daz di Trawn ab get, gefurt sol werden zu der Stat ze Enns in daz Reintal, vnd sullen es da wandlen, verchauffen oder ablegen in die cha^esten, ob si es verchawffen nicht mochten, vnd daraus verwandln, wie sew wellent, vnd vbern seczen auf ein andern podem vnd ab fueren, wa si wellent, wer aber, daz sy dasselb salcz zu hant wolten abfurn vnd nicht ablegen noch verchawffen, so schullen si dasselb Salcz auf ein andern Podm vberseczen, er sei ir oder wes er sey, daz mugen sew wol getun, vnd sol sew daran nyemant irren, es sullen auch die Ensser mit in gutleich vnd vrewntleich leben mit chawffen vnd mit verchawffen, vnd auch wandlen, als zeitleich vnd pilleich ist, vnd daz disew sach furbaz Also Stet, vnd vnezebrochen beleib, geben wir vnssern Purigern ze Enns zu einem offen vrchund disen prief wesiglten mit vnssern Insiglen geben ze Enns am Mittichen in der Ossterwochen da nach christes gepurde ergangen warn drewczehen hvndert Jar vnd darnach in dem fvnff vnd dreisskisten Jare.

Source Fulltext: OÖUB 6 (Wien 1972), S. 159, Nr. 153