Ich Vlreich von Pergawe, zv den Zeiten meines gnedigen Herren Hofmaister Hertzog Albrechtes in Österrich, vnd jch Perchtolt von Pergowe sein bruder wir veriehen vnd tun chunt allen den, die disen brief lesent oder horent lesen, Die nu lebent vnd her nach chu^enftig sint, Daz wir mit vnserr Erben gutem willen vnd gunst, mit verdachtem mu^ete zv der zeit, da wir ez wol getun mochten, Recht vnd Redelichen geben haben ze Rechtem wyderwechsel vnsers Rechten Aygens, Das wir gehabt haben Sechsthalb Phunt wienner phenninge Geltes, Die da ligent auff dem Mayz zwischen Merchenstain vnd Gvnvarn vnd Ein Mv^el vnd das Mv^elvelde da selbens, Die Thomas von dem Newen Haus von vns ze Lehen gehabt hat, mit allem dem nutzze vnd rechte, als wir Ez in aygens gewer her pracht haben, Den erbem Herren hern Eberharten, hern fridreichen vnd hern Hainrichen Den Pru^edern von walse hern fridreiches Sv^ene von walse, Dem Got gnade, vnd irn Erben fvrbaz Ledichlichen vnd vreilichen ze haben vnd allen jren frumen Damit ze schaffen, verchauffen, versetzzen vnd geben, swem sev wellen, als jn das wol cho^eme vnd fv^ege an allen irresal. Da engegen so habent sev vns her wider geben ze rechtem wyderwechsel auch jres Rechten aygens viertzehen schillinge wienner phenninge Geltes, Die da ligent ze Eberrichstorff, Die der wyersing von Potendorff von jn ze Lehen gehabt hat, vnd dar zv vier Phunt Geltes auch aygens auff der Hofermvl, Die Vlreich des alten Schv^etzzenmaister sun von steyr von jn ze Lehen gehabt hat, auch mit allem dem nutzze vnd rechte, als sev die selben Gvlte in aygens gewer her pracht habent, auch Ledichlichen vnd vreilichen ze haben vnd fvrbaz allen vnsern frumen Damit ze schaffen, verchauffen, versetzzen vnd geben, swem wir willen, als vus daz wol cho^eme vnd fvge an allen irresal. Wir sein auch der vorgenanten Gvlte fvrbaz jr Rechter scherm vnd gewer fvr alle ansprach, als aygens Recht ist vnd des Landes Rechte ze O^esterrich. Vnd daz die Rede fvrbaz also stete sei und vntzebrochen beleibe, Dar vber so geben wir jn disen brief zv einem offen vrchvnde vnd gezevge vnd zv Einer Ewigen vestenunge Diser sache versigelten mit vnsern Insigeln. Diser brief ist geben ze wienne nach Christes gebvrt Drevtzehen Hundert jar Darnach in dem fvmf vnd Dreizzigistem Jar an sand Lutzeyn Tage.

Source Fulltext: OÖUB 6 (Wien 1972), S. 192f., Nr. 187