Wir Pruder Wu^elfinch zv den zeiten Apt vnd Der Conuent gemain in dem Chloster vnserr Vrowen Datz dem Heiligen Chrevtz veriehen vnd tvn chunt allen den, die disen brief lesent oder horent lesen, Die nu lebent vnd her nach chu^enftich sint, Daz wir mit wol vereintem mute zv der zeit, da wir ez wol getun mochten, Recht vnd redlichen auz gezaiget haben Dem Edeln Herren hern Vlrichen von Pergawe zv den zeiten Hertzog Albrechtes Hofmaister in O^esterrich vnd in steyr vnd hern Perchtolten von Pergawe seinem bruder vnd ren Erben fu°nf Phunt und sibenthalben phenning wienner phenninge Geltes auf dem Dorffe ze Arbaistal, Daz wir wider hern Vlrichen den stu^echsen gechauft haben vnd der Drev Phunde geltes ligent auff zwain Lehen vnd ain Phunt geltes auff ainem Lehen vnd da selbes vier vnd zwaintzzich Huener, Daz ie das Hv^en gerait ist fvr vier phenninge, vnd auff vrbar Ekchern fv^emf schillinge Geltes. Die selbe Gvlte haben wir jn auzgezaiget fur die fu^emf Phunde Geltes, Die ir vater her Vlreich von Pergawe, Dem Got gnade, bei seinen Lebentigen zeiten wider vns gechauft hat vmb fu^emftzzich Phunt phenninge, Der wir gar vnd gentzlichen gewert sein, als Er dez von vns Einen guten brief hat, vnd die wir jm zv seinem jartage auzgezaiget scholden haben auff dem Dorffe ze Arnsteten, Da nu Hertzog Heinrichs se\aligen jartag auff leit, So beschaidenlichen, Daz wir vnd vnser Nachchumen furbaz Ewichlichen alle iar jn vnserm vorgenanten Chloster ie dez freitages jn der Phingestwochen begen schvllen dez egenanten hern Vlreichs jartag Des Alten von Pergawe, Dem got gnade, vnd aller seiner vodern jartage mit vigili, mit selmesse, mit anderm gebet, daz darzv geho^eret vnd dez selben Tages schol man geben ie dem Herren Drev stukche vische, ain semel vnd pezzern wein nach vnsers Ordens gewonhait, vnd swelhes jares der jartag also nicht begangen wu^erde, als vor geschriben stet, so schol sich der vorgenant her Vlreich von Pergawe Hertzog Albrechtes Hofmaister vnd her Perchtold von Pergawe sein bru^eder oder jr Nachchvmen Der egenanten Gvlte ze Arbaistal vnderwinden vnd schvllen die so lange jnne haben, vntz daz wir allez daz gepezzern, Daz vor an dem jartage versavmet ist. Vnd dar vber zv einem vrchvnde so geben wir jn disen brief versigelten mit vnserm anhangundem jnsigel. Der ist geben ze wienne nach Christes gebvrt Drevtzehen Hundert iar, Darnach in dem fv^emf vnd Dreizzigistem jar an sand Kathrein Tage.

Source Fulltext: OÖUB 6 (Wien 1972), S. 189f., Nr. 184