Ich Hadmar von volchenstorf vnd ich Offmey Sein Hausurowe Wir veriehen vnd Tv^en chvnt allen den, die disen brief lesent oder ho^ernt lesen, Die nv lebent vnd hernach chvnftich sint, Daz wir mit aller vnser erben gu^eten willen vnd gvnst mit verdachtem mv^et vnd mit gesampter hant zv der zeit, do wir ez wol getvn mochten, Recht vnd redleich vercauft vnd geben haben vnsers rechten aigens, Daz mich vorgenanten Offmeyn an erstarben ist von meinem Vater hern Otten dem Hoevsler von wildenstain, dem Got genade, alles daz Perchrecht vnd alle di weingarten, di wir gehabt haben datz Chirichling vnd datz Chritzendorf, swie so daz genant ist, mit allem dem nvtze vnd rechten, alz wir ez in aigens gwer her pracht haben vnd als ez von alter her chomen ist, Vmb zwainzich phvnt wienner Phenning, der wir recht vnd redleich gewert sein, Otten von wildek vnd seiner Hausurowen vron Offmeyn vnd allen iern Erben furbaz ledichleich Vreileich ze haben vnd allen iern frvmen da mit ze schaffen, verchauffen, versetzen und geben, swem si wellen, an allen irrsal. Vnd sein auch wir vnd vnser erben dez vorgenanten Perchrechtes vnd weinwvchs, daz gelegen ist ze Chirichling vnd ze Chritzendorf Otten von wildek vnd seiner Hausurowen vron Offmeyn vnd aller ierr erben recht gwern vnd scherm fu^er alle ansprach, als aigens recht ist vnd dez Landes recht ze Osterreich, waer aber, daz si mit recht an dem vorgenanten gu^et, als vor verschriben ist, dehain ansprach gewunnen, von swem daz waer, daz svln wir in an allen iern schaden allez auz richten, vnd svln auch si daz haben auf vns vnd auf allem vnserm gu^et, daz wir haben in dem Lande ze Osterreich, wir sein lebentich oder Tode. Vnd daz diser chauf furbaz also staet vnd vnzer brochen beleib, Dar vmb so geben wir dem vorgenanten otten vonwildekke vnd seiner Hausurowen vron Offmeyn vnd allen iern erben disen brief ze einem offen vrchvnd vnd ze einem warn gezevg vnd ze einer ewigen vestenvnge diser saeh versigilt mit vnserm Insigil Vnd mit hern fridreichs Insigel dez Hoevsler, der diser sach gezevg ist mit seinem Insigil. Diser brief ist geben ze wienne nach Christes gepu^ert Drevzehen Hvndert iar, dar nach in dem fumf vnd Dreizgisten iar dez nachsten svntags nach aller Heiligen Tag.

Source Fulltext: OÖUB 6 (Wien 1972), S. 184f., Nr. 178