Ich Fridreich der Walich von der Freinstat vnd mein Hausfrowe vnd vnser Eriben wier veriehen vnd tuen chunt allen den, die disen brief lesent oder horent lesen, daz wier mit vnserr nasten vnd pesten frewnt rat haben verrichtet vns mit den geistleichen Herren des chlosters von Hahenfuert vm di tzway weingertel, di mein vater vnd sein Hausfrowe in geschafft hat vnd der leit ains pei Leubs an dem Haslech vnd dient alle iar an sand Michels Tag drithalben wienner phenninch sand Mertein hintz zebing, das ander leit pei Goboltzpurch in den Gern vnd dinent alle iar an Sand Michels tag funf wienner phenning den Herren von Chirichling. Vnd di selben weingartel hab wier in ledich lazzen vnd haben seu aufgegeben mit Perchherren hant dem Geistleichen Herren Hern Hainreichen ze den czeiten ieren Pitanczer an ier aller stat vnd darum habent seu vns gegeben dreu phunt wienner phenning, der wier schon gewert sein. Wier schuln auch fuerbaz der vorgenanten weinga^ertlein ier rechter scherm sein fuer alle ansprach. Vnd ich Fridreich walich gib in darvber disen brief ze vrchund versigelt mit meinem Insigel vnd czu ainem gezeuge versigelt mit Hern Chunrates des walich Insigel vnd zu gezeuge di Erbern leut Hern Vlreich vnd Hern Pilgreim di walich, Maricharten der Poschen ze den tzeiten Richter datz Leubs, Vlreichen den amptman, Nyklan seiner swester sun vnd ander leut genueg, den di sachhe wol chund ist. Der brief ist gegeben nach Christes geburd dreutzehen Hundert iar, darnach in dem funf vnd dreizigistem iar, an sand Cholmans Tag.

Source Fulltext: OÖUB 6 (Wien 1972), S. 181f., Nr. 175