Ich Chalhoch von Pernowe vnd ich fridreich von Pernawe vnd mein Hausvrowe vro Peters vnd vnser paider Erben wir veriehen offenbar an disem prief vnd tu^en chunt allen den, di in ansehent oder horent lesen, di nu lebent oder Hernach chunftig sint, daz wier mit wolbedachtem mu^et vnd mit gu^etem willen vnser pesten vreunt haben verchauft vnsern zehent in dem Chunigslag auf Siben ganczen Rev^eten dem Erbern Ritter Hern Artwein von walpu^erch vnd seinen Erben vmb czwaiundreizk phunt wienner phenning, der er vns redelichen vnd recht verricht vnd gwert hat, vnd schullen auch des egenanten zehents sein gwer sein vnd seiner erben, swo in des durft geschiecht ze Hof vnd ze Tayding vnd fu^er vnser erben, di nu lebent oder Hernach chunftig werdent. vber di red nem er oder sein Erben darvber dhainen schaden, den schullen si Haben auf aller der hab, di wir in dem Lant ze Osterrich haben, darvber geb wier ich Chalhoch vnd ich Fridreich von Pernowe disen offen prief zeim vrchund vnd zeim waren zevg mit vnsern anhangunden jnsigeln, daz di vorverschriben red stêt vnd vnzebrochen beleib. Der prief ist geben nach Christes gebu^ert Drevzehen Hundert jar, darnach in dem Sechs vnd dreizkisten jar an Sand Georgen tag in der Vreinstat.

Source Fulltext: OÖUB 6 (Wien 1972), S. 205, Nr. 201