Wir Graf Leutolt vnd Graf Heinrich, Bru^eder von Schowenberch vergehen offenlich mit Disem Brief vnd tun chunt allen den, di in sehent oder horent lesen, Daz wir vnsern Gnaedigen Herrnn Bischof Albrecht ze Pazzowe vnd sein Gotshavs gentzlich ledig lazzen aller der Ansprach, di wir hintz im heten vmb den chrieg, der zwischen vns vnd seinem Ritter dem Egenperger was in dem Attergaev. auch haben wir in ledig lazzen alles des geltes, des er vns darvmb schuldich was, Also daz wir noch vnser Brueder, di sich auch vnder vnsern Insigeln verpindent, hintz dem vorgenanten vnserm Herren Bischof Albrecht, noch hinz seinem Gotzhavs vmb den selben schaden noch vmb daz gelt dhain ansprach noch vordrang nicht mer haben sullen noch gewinnen. Es sind auch all brief, die wir dar vmb von im haben, ab vnd sullen nicht chraft haben. Vnd dar vber ze vrchund geben wir fur vns vnd vnser Brueder diesen Brif versigelt mit vnsern anhangunden Insigeln. Der ist geben ze Pazzowe an Sunntag ze mittervasten nach Christes geburd Dreutzehen Hundert iar, in dem Sechss vnd dreizzkistem Jar.

Source Fulltext: OÖUB 6 (Wien 1972), S. 203f., Nr. 199