Ich Hainreich der Hagekker vnd ich . . . . sein Hausvrawe mit sampt vnsern erben wir veriehen mit disem prief vnd tv^en chvnt allen den, die in sehent oder ho^erent lesen, Daz wir mit gesampter hant vnd vnser vrevnt gu°tem willen zv der zeit, do wir daz wol mahten getv^en, verchauffet haben vnsers rehten aigens ainen Hof in dem Cherspavmpach vnd haizzet an der o^ed, vnd swaz dor zve geho^ert, do man alle iar von dienet ain halbes phunt wienner phenning an Sand Pölten tag vnd an Sand Mychels tag ain halbes phunt, dem erbarn manne Hern Hainreichen Chapplan datz Sand johans ze Traisem vmb fvnfzehn phvnt wienner phenning, der wir gentzleich sein verrihtet. Vnd schol der egenant Hainreich den selben Hof vnd swaz dor zve geho^ert, ze veld vnd ze dorfe, holtz, waid, wismad, versueht vnd vnuersueht, swie daz genannt ist, an allen dingen hin fvr ewichleich haben mit allen rehten vnd nutzze, als wir den enher gehabt haben in rehter aigens gwêr, allen seinen frvˆmen domit schaffen mit versetzen, verchauffen oder gebn, wem er welle an allev irrung. Vnd durich pezzer sieherhait setze ich vorgenanter Hainreich mit sampt meiner ebenanten hausvrowen vnd erben vns dem vorgenanten Hainreichen Chapplan ze Traism vber den ebeschriben hof vnd swas dor zv geho^ert, zv rehtem scherm vnd gwern fv^er allev ansprach als lang, als reht ist aigen ze schermen in dem lande ze O^esterreich, vnd swaz im chost oder mvˆe von reht mit ansprach dor auf gieng, daz schulle wir im ablegn vnd schol daz habn auf allem dem gût, daz wir habn in dem lande ze Osterreich. Vnd daz der chauf also stêt vnd vnzebrochen beleibe, gebe wir disen prief zv ainem ewigen gezevg diser sache versigelten mit meinem des vorgenanten Hainreiches des Hagekker insigel und mit hern Nyclas des Ramsawer insigel, den ich dor vmb gepetn han vnd der auch mit sampt mir vber den ebeschriben chauf scherm und gwer ist fvr allev ansprach vnd der sache gezevg mit seinem insigel. Des sind auch gezevg Her Ditreich vnd her Stephan von hahenberch, her Chadolt der altenburger, her volchwein der Pomer, Ott der Nevnwalder, vlreich der Grevl vnd ander erber leut genvˆg. Der prief ist gebn nach Christ geburd vber Tausent iar, drevhundert iar, in dem sibn vnd dreizzigisten iar An aller heiligen Tag.

Source Fulltext: OÖUB 6 (Wien 1972), S. 252f., Nr. 247