Wir Graf Hainreich von Schovnberch vnd Graf wernhart vnd Graf wilhalm vnd Graf Fridreich vnd alle vnser Erben wier veriehen vnd tvn chunt allen den, die disen brief sehent oder horent lesen, di nv lebent vnd her nach chv^emftig werdent, daz wir mit guetem willen vnd wol mit verdahtem mvet Haben gesetz (sic) Vlreich dem Tannbergoer Siben phvnt geltz fu^er ains vnd Sibenzich phunt phenning pazzawer mv^enss avf vnserm Amt datz Aschach, daz Pambberger Amt haitz; vnd die vor genanten siben phvnt phenning, die schol im vnser Amtman geben, wer iaerchleich vnser amtman ist vber Pambberger gvet, die in daz amt gein Aschach gehorent, alle iar an vnser vrowentage zter dienstzeit. waer aber daz, Daz im vnser Amtman der vorgenanten Siben phunt phenning niht gab, daz schol er vns ze wizzen tvn, welchen er vnder vns peraichen mach Oder wer dann vnser rihter ist, so schu^ellen wier schaffen oder vnser rihter, daz der vorgenant Vlreich von Tannberch in vierzehent tagen verriht wiert de E genanten Siben phvnt phenning. waer aber daz, Daz er dannoch niht ver riht wuerde, so hat er gewalt ze phenten die Leut, die avf Pambberger guet sitzent, die in daz Amt gein aschach gehorent vnd dez schol er vngolten sein gegen vns vnd gegen vnsern Amtleuten. Naem er der phantvng iht schaden von vns oder von den vnsern, den schullen wier im abe tvn vnd schullen avch wier den gelt nindert verchummern, vntz daz wier von dem vorgenanten vlrich von Tannberch lo^esen vm die vor genanten Ains vnd Sibenzich phvnt pazzawer munss; vnd wem der vor genant vlrich von Tannberch den brief geit vnd der in hat, dem sei wir vnd vnser Amtman Aller der gelu^eb vnd der reht schuldich vnd punden, als si hie vor geschriben stet an dem brief. So hab wier gewalt ze losen von dem vor genanten vlreich von Tannberch in vierzehen tagen vor vnser vrowe tage zter lieht messe vnd in vierzehen in nach, daz die rede staet vnd gantz vnd vnverchert peleibe, dar u^eber geb wier Graf Hainreich von Schovnberch vnd Graf wernhart vnd Graf Wilhalm vnd Graf Fridreich disen brief versigelt mit vnsern Hangungen (sic) Insigeln. Der brief ist gegeben, do man zahlt von christes gepurt drevzehent hundert Jar, dar nach in dem Aht vnd dreizzigistem Jar an dem Prehentag.

Source Fulltext: OÖUB 6 (Wien 1972), S. 256f., Nr. 251