Wir Graf Hainreich von Schovnberch vnd vnser Bru^eder alle Vnd wir Graf Chunrat ir veter von O^ert veriehen vnd tun chunt allen den, die disen prief lesent oder hornt lesen, di nv lebent vnd hernach chunftig sint, Daz wir mit vnser Erben guetem willen vnd gunst vnd mit wol veraintem rat ze der zeit, da wir iz wol getuen mochten, Lauterleich durch got vnd durch vnser vrowen willen vnd auch durch vnser vnd aller vnser vordern sel hail willen haben gegeben den erbern vnd den geistleichen vrowen der Samnvng datz Sand Pernhart di aigenschaft vier pfunt pfenning geltz, di si gechovft habent von hern Pillvngen vnd ligent datz Naelib ouf holden vnd auf aekkern vnd auf anderm guet, fu^erbaz ledichleichen zehaben mit allem dem nutz vnd recht, als wir di selben aigenschaft inne haben gehabt, vnd daz disev sache also furbaz staet vnd vnzebrochen beleib, dar vmb so geb wir Graf Hainreich von Schovnberch vnd wir Graf Chunrat von O^ert Den vorgenanten vrowen datz sand Pernhart disen prief zv einem offenn v^erchunt vnd zv einem warn gezevg diser sache versigelten mit vnsern jnsigeln. Der prief ist gegeben datz Wienne in der Stat nach Christes gepu^ert Drevtzehen Hvndert iar, dar nach in dem acht vnd Dreizzigisten iar an sand Agnesen tag der heiligen magt.

Source Fulltext: OÖUB 6 (Wien 1972), S. 259, Nr. 254