Wir Ludewig vnd Fridrich Grauen von O^etingen vnd Lantgrauen in Elsazzen Vergiehen mit disem brief, Daz wir dem Edeln manne vnserm lieben Sweher vnd Bru^eder Grauen Hainrich von Schauenberch vnd allen sinen erben beholfen sullen sien mit minne oder mit reht, so wir best mugen an geuerde, daz in daz Gut wider werde, daz ze Truhendingen vnd ze Spilberch gehort vnd zv der Bru^enst vnd anderswa, swa wir daz erforschen, an Alrhaim, vnd sullen wir daz inne haben in allem dem rehten, als ander gu^et, daz er vns enpholhen hat nach der brief sage, die wir von dem hirat haben vnserr Kinde. Er hat vns auch enphalhen den Grozzen brief dez von Niffen vmb di Lösung ze Hohentruhindingen vnd dez Kaisers brief dar vber, deu brief vmb die lehen ze guelnhouen, daz er siner Kinde triwer treger sol sin, vnd der diener brief, daz si Stielnhouen enphangen habent sinen Kinde ze tragen in triwes hand vnd die tail brief vmb Spilberch vnd wioltingen vnd vmb den Vorst ze Guntzenhusen, daz wir im die behalten suln in triwes hand. Er hat im auch behalten die Ansprach, die er hat vmb den vberschatzz ze Alrhaim. Dar vber ze vrchund geben wir in disen brief versigelten mit vnsern Insigeln, die dar an hangent. Data anno domini M°. CCC°. XL°, jn vigilia Assumpcionis Marie virginis.

Source Fulltext: OÖUB 6 (Wien 1972), S. 345f., Nr. 340