Ich Reinprecht von Pilichdorff Vergich vnd tu^en chvnt allen den, die disen brief lesent oder ho^erent lesen, Die nu^e lebent vnd hernach Chu^enftich sind, Daz ich mich dez mit meinen trewen verlu^ebt vnd verpunden han Gegen meinem Swager V/reich von Pergawe vnd gegen seinen Geswistereiden vnd gegen irn Erben Also, swenne daz ist, daz ich der fumf Hundert phunt wienner phenninge gar vnd gaenczleich verriebt vnd gewert wirde, die man mir gelu^ebt hat ze meiner Hausurowen vron Hoedweigen, dez vorgenanten v^elreichs Swester von Pergawe, ze rechter Haymstev^er vnd fu^er die fu^ertzicht, der ich mich mit sampt meiner Hausurowen vron Hoedweigen gegen in verzigen han, daz ich denne die selben fumf Hundert phunt nach der Zeit, vnd ich ir verricht wirde, dar nach inner iars vrist an Erbe legen sol nach vnser baider Freunde Rat Also, ist, daz mein Hausurowe vro Hoedweig Chinder mit mir gewinnet, die su^eln denne daz selb Erbe, daz vmb die egenanten fumf Hundert phunt gechauft wirde, nach vnser baider Tode ledichleichen erben vnd besitzen an allen chrieg. Waer aber, daz mein Hausurowe vrowe Hoedweig stürbe vnd nicht Chinder mit mir gewunne, dez Got nicht enwelle, So sol ich dennoch daz vorgenant Erbe, daz vmb die egenanten fumf Hundert phunt wienner phenning gechauft wirde, in nutz vnd in gewer inne haben vnnerchummert vntz an meinen Tode, alz Haymsteur recht ist vnd dez Landez recht ze O^esterreich, vnd nach meinem Tode So sol denne daz oftgenant erbe, daz vmb die vorgenanten fumf Hundert phunt gechauft wirde, ledichleichen erben vnd geuallen auf den vorgenanten meinen Swager Vlreichen von Pergawe vnd auf seinev geswistereide oder auf ander ir naechst erben, da iz denne ze recht auf erben vnd guallen sol an allen chrieg vnd an alle wider rede nach dez Landez recht ze O^esterreich. Vnd daz ditz gelu^ebe vnd disev Sach also staet vnd vnzerbrochen beleibe, Dar vmb so gibe ich dem vorgenanten meinem Swager v^elreichen von Pergawe vnd seinen Geswistereiden vnd irn erben disen brief ze einem warn Sichtigen vrchunde versigilten mit meinem jnsigil vnd mit meiner Vetern jnsigiln hern albers vnd Hern Hoertneides der bru^eder von Rauchenstain vnd mit meins Lieben Freundes jnsigil Reinprechtes dez Tu^ersen, di diser Sache gezeug sind mit irn jnsigiln. Diser brief ist geben ze wienne nach Christes gebu^erde Dreutzehen Hundert iar, dar nach in dem Viertzgisten iar an sand vlreichs Tage.

Source Fulltext: OÖUB 6 (Wien 1972), S. 644f., Nr. 88 (Anhang)